Ál-Kýáıt qalasynda tutanatyn 7-Qysqy Azııa oıyndarynyń Alaýyn QR Týrızm jáne sport mınıstri qabyldap alady

Bul týraly «QazAqparat» tilshisine bergen suhbatynda Oıyndardy uıymdastyrý jónindegi astanalyq dırektsııa basshysynyń orynbasary Sársen Quranbek málim etti.

Buǵan deıin habarlaǵanymyzdaı, Azıada Alaýy 2011 jylǵy 11 qańtar kúni Azııa Olımpıadalyq keńesiniń (AOK) shtab-páteri ornalasqan Ál-Kýáıt qalasyndaǵy «Kýveıt Taýers» munaralarynyń aldyndaǵy alańda tutandyrylady. Alaýdy saltanatty jaǵdaıda tutandyrý qurmeti AOK-nyń Prezıdenti sheıh Ahmad ál-Fahad ál-Sabahqa berildi. A.Sabahtyń qolynan Alaýdy qazaqstandyq taraptan birinshi bolyp 7-Qysqy Azııa oıyndaryn Uıymdastyrý komıteti tóraǵasynyń orynbasary, QR Týrızm jáne sport mınıstri T. Dosmuhambetov qabyldap alady.

Óz kezeginde T.Dosmuhametov Alaýdy muzda mánerlep syrǵanaýshy Abzal Rahymǵalıevke tapsyrady. Odan ári Ot - Kýáıt sportshysynyń jáne buǵan deıingi Qysqy Azııa oıyndaryn óz alańdarynda qabyldaǵan káris, qytaı jáne japon elderi sportshylarynyń qoldaryna ótedi. Shaǵyn estafetany otandyq veloshabandoz Aslan Bazaev tuıyqtaıdy. Saltanatty shara «Sazgen sazy», «Gúlder» ansamblderi men «Ulytaý» tobynyń kontsertine ulasady.

7-Qysqy Azııa oıyndarynyń Alaýyn tutandyrý rásimi basynan aıaǵyna deıin Azııa elderiniń ortalyq telearnalarynda tikeleı efırde kórsetiletin bolady.

Al 12 qańtar kúni Alaý ushaqpen Almaty qalasyna jetkiziledi de, Qazaqstandaǵy Azıada Alaýy estafetasynyń alǵashqy kezeńi bastalady. Árbir alaýgerge 6 alaý saqshysy men arnaıy avtokolonna ilesip júretin bolady. Dál osy tártippen estafeta eldiń barlyq óńirlerinde ótedi. Saıahat barlyǵy 20 kúnge sozylady. Estafeta 30 qańtar kúni Astana qalasyndaǵy «Astana-Arena» stadıonynda márege jetip, Oıyndardyń bas qazandyǵyn jaǵady. Aıta keteıik, estafetaǵa respýblıka boıynsha barlyǵy 1020 alaýger, ár oblystan - 60, Almatydan - 80 jáne Astanadan - 100 adam iriktep alyndy.

S.Quranbektiń aıtýynsha, ár alaýger syıǵa arnaıy sertıfıkat pen kádesyı alady.