Ál-Kýáıt qalasynda Qazaqstanda ótetin 7-Qysqy Azııa oıyndarynyń Alaýy jaǵyldy

Aq Azıada Alaýyn jaǵý rásimi Ál-Káýıt qalasynda ornalasqan «Kýáıt Taýers» munaralarynyń aldyndaǵy alańda ótti. Oǵan QR Týrızm jáne sport mınıstri Temirhan Dosmuhambetov jáne Azııa Olımpıadalyq keńesiniń prezıdenti Sheıh Ahmad ál-Fahad as-Sabah qatysty. Atalmysh munaralarǵa tańdaý kezdeısoq túsken joq. Olardyń kóshirmesi Qazaqstannyń bas qalasy - Astanada boı kótergen. Qazir onda QR Aýyl sharýashylyǵy mınıstrligi ornalasqan.

Saltanatty is-shara «Sazgen sazy», «Gúlder» ansamblderiniń jáne «Ulytaý» tobynyń, sondaı-aq kýáıttyq shyǵarmashylyq ujymdardyń kontserttik baǵdarlamasymen bastaldy. Odan keıin Azııa Olımpıadalyq keńesiniń prezıdenti sheıh Ahmad ál-Fahad ál-Sabahqa jáne qazaqstandyq tarapty bastap barǵan QR Týrızm jáne sport mınıstri Temirhan Dosmuhambetovke sóz berildi.

Qazaqstandyq Azıadanyń Alaýyn sheıh Ahmad ál-Fahad ál-Sabah tutandyrdy. Onyń qolynan Alaýdy qazaqstandyq taraptan birinshi bolyp T. Dosmuhambetov qabyldap aldy. Óz kezeginde T.Dosmuhambetov Alaýdy muzda mánerlep syrǵanaýshy jerlesimiz Abzal Rahymǵalıevke tapsyrdy. Odan ári Ot - Kýáıt sportshysynyń jáne buǵan deıingi Qysqy Azııa oıyndaryn óz alańdarynda qabyldaǵan Koreıa, Qytaı jáne Japonııa elderi sportshylarynyń qoldaryna ótti. Shaǵyn estafetany «Astana» velokomandasynyń múshesi Aslan Bazaev tuıyqtady.

Saltanatty shara Azııa elderiniń barlyq ortalyq telearnalarynda tikeleı efırde kórsetildi.

Erteń, 12 qańtar kúni Azıada Alaýy Qazaqstanǵa, naqty aıtqanda Almaty qalasyna jetkiziledi. Jáne osy kúni Azıada Alaýynyń eldiń oblys ortalyqtary boıynsha estafetasy bastalady. Árbir alaýgerge 6 alaý saqshysy men 13 kólikten quralǵan kolonna ilesip júretin bolady. Estafeta 30 qańtar kúni Astana qalasyndaǵy «Astana-Arena» stadıonynda márege jetip, Oıyndardyń bas qazandyǵyn jaǵady. Estafetaǵa respýblıka boıynsha barlyǵy 1020 alaýger, ár oblystan - 60, Almatydan - 80 jáne Astanadan - 100 adam iriktep alyndy.