«Ál-Kaıda» sodyrlaryn ýaǵyz arqyly jáne fıtnespen tezge salatyn boldy
ASTANA. 22 sáýir. QazAqparat - Er-Rııadta «Ál-Kaıdanyń» tutqyndalǵan jáne sottalǵan sodyrlaryn ońaltý ortalyǵy ashylatyn boldy.
Atalmysh ortalyq ishki ister mınıstri, hanzada Muhammed bın Naıftyń qarjysyna ashylyp otyrǵanyn aıta ketý kerek.
Ortalyqta dinı qaıratkerler, psıhologtar, massaj jasaýshylar jáne fıtnes jattyqtyrýshylar jumys isteıtin bolady. Bul jaıynda «Frans-Press» habar taratty.
Ortalyq bir mezgilde 228 adamdy qabyldaı alady. Ózin jaqsy jaǵynan kórsete bilgen tutqyndarǵa eki kúndik demalys beriledi.
muslim.kz saıtynyń jazýynsha, mundaı ortalyq buǵan deıin Jıdda qalasynda da ashylǵan edi. Alaıda, astanalyq keshen oǵan qaraǵanda áldeqaıda jaıly bolyp shyqty. Jaqyn arada eldiń soltústiginde, shyǵysynda jáne ońtústiginde osyndaı taǵy úsh keshen ashylady.
Ortalyqta Saýd Arabııasynda qolǵa túsip, qamaýǵa alynǵan úsh myńdaı radıkal tárbıelenedi. Eger ońaltý sharalary óz nátıjesin berse, olardy bostandyqqa shyǵarady.
