«Ál-Kaıda» kóshbasshysy jıhadshylardy Bashar Asadqa qarsy birigýge shaqyrdy
ASTANA. 23 qańtar. QazAqparat - Tanymal ınternet-portaldardyń biri arqyly «ál-Kaıda» lańkestik uıymynyń kóshbasshysy Aıman ál-Zavahırı Sırııada janjaldasyp jatqan jıhadshylar men ıslamshyldarǵa tez arada ózara soǵysty toqtatý jóninde aýdıoúndeý joldady.
Arab eliniń birqatar buqaralyq aqparat quraldarynyń habarlaýynsha, Sırııada «ál-Kaıda» uıymynyń bir salasy «Djebhat an-Nýsra» men «Irak pen Levantanyń Islamı memleketteri» arasynda qaqtyǵystar oryn alýda. A.Ál-Zavahırı óziniń úndeýinde sodyrlardy bir ǵana jaýǵa - «Sırııa prezıdenti Bashar ál-Asadtyń rejımine qarsy birigýge» shaqyrady.
Aıta keteıik, úsh jyldan beri Sırııada súnnıttik ıslam toptarynan quralǵan oppozıtsııalyq kúshter men Sırııa úkimetiniń jaýyngerleri arasynda qarýly qaqtyǵystar jalǵasyp keledi. BUU málimetterine sáıkes, osyndaı kıkiljiń saldarynan 100 myńnan astam adam qaıtys bolǵan.
