«Al-Kaeda» Iemendegi AQSh elshisin óltirgen adamǵa 3 keli altyn beretindigin málimdedi
ASTANA. 31 jeltoqsan. QazAqparat - «Al-Kaeda» lańkestik tobynyń Iemendegi uıymy osy eldegi AQSh elshisi Djerald Feıersteındi (Gerald Feierstein) óltirgen adamǵa 3 keli altyn beretindigin málimdedi, dep habarlaıdy lenta.ru Associated Press agenttigine silteme jasap.
Sonymen qatar lańkester Iemendegi árbir amerıkalyq jaýyngerdiń basyna 5 mıllıon rıal (shamamen 23 myń dollar) tigetindikterin habarlaǵan. «Al-Kaeda» ókilderi atalmysh sharttar aldaǵy alty aı boıy kúshinde bolady dep otyr. Olardyń atap ótkenindeı, osyndaı usynys «ıemendik musylmandardy jıhadqa rýhtandyrady».
Vashıngtonnyń baǵalaýynsha, «Arab túbegindegi Al-Kaeda» degen atpen tanymal «Al-Kaedanyń» Iemendegi qyzmeti halyqaralyq terrorlyq jeliniń óte qaýipti uıashyqtarynyń biri bolyp tabylady.
Top sodyrlary «arab kóktemi» kezinde Álı Abdýlla Salehti taqtan taıdyrǵan eldegi kóterilisten keıin, birshama kúsheıgen. 2011 jyly terrorshylar eldegi teketiresterdi paıdalanyp, memlekettiń birqatar eldimekenderine, ásirese Iemenniń ońtústik bóligindegi jerlerge ıelik etip aldy. Saleh ketip, eldegi jaǵdaı turaqtala bastaǵanda, resmı áskerler AQSh-tyń kómegimen kóptegen aýdandardy qaıtardy. Degenmen lańkester keıbir kishigirim aýyldarda bekinip alyp, úkimettik áskerge ara-kidik shabýyldar jasap turady.
