«Ál-Kaeda» kóshbasshysynyń inisi musylmandar men Batysty tatýlastyrýdyń jolyn usyndy
ASTANA. 12 qyrkúıek. QazAqparat - «Ál-Kaeda» kóshbasshysy Aıman ál-Zavahırıdiń inisi Muhamed ál-Zavahırı musylmandar men Batysty tatýlastyrýdyń jobasyn jasap shyqty. Bul týraly ol CNN telearnasyna bergen suhbatynda aıtqan.
Muhamed ál-Zavahırıdiń aıtýynsha, ol qazir aǵasymen tyǵyz baılanysta jáne tek ol ǵana «Ál-Kaeda» kóshbasshysyn Batyspen bitimge kelýge shaqyra alady. Degenmen ol óziniń usynystary keıbir radıkaldy ıslamısterge unamaı qalýy múmkin ekendigin de jasyrmaıdy.
Óziniń 6 bettik beıbitshilik kelisiminde Muhamed ál-Zavahırı belgili bir talaptar oryndalsa, keminde 10 jyldyq beıbitshilik ornaýy yqtımal ekenin aıtady. Talaptar tiziminde AQSh pen batys elderiniń ıslam elderiniń aýmaǵyna basyp kirýin toqtatý, AQSh-ta tutqynda jatqan barlyq musylmandardy bosatý jáne musylman elderdiń bilim berý saıasatyna AQSh-tyń aralaspaýy sııaqty birqatar sharttar qoıylǵan. Al musylmandardan Muhamed ál-Zavahırı AQSh pen Batysty arandatpaý, olardyń musylman álemindegi lıgıtımdik qyzyǵýshylyqtaryna qol suqpaý sııaqty jeńildikterge barýdy suraıdy.
Muhamed ál-Zavahırı 1999 jyly lańkestikke jáne Mysyrdyń burynǵy prezıdenti Anvar Sadatty óltirýge qatysy bar degen aıyppen túrmege túsken bolatyn. Al 2011 jyldyń naýryzynda túrmeden shyǵyp, ili-shala qaıta qamalǵan. 2012 jyldyń kókteminde lańkestikke qatysy joqtyǵy dáleldenip, birjola bostandyqqa shyqqan.
Aıman ál-Zavahırı 2000 jyldardan bastap «Ál-Kaedada» Osama ben Ladennen keıingi ekinshi adam bolyp sanalady. 2011 jyldyń maýsymynda ben Laden óltirilgen soń, ol «Ál-Kaeda» tizginin óz qolyna aldy.
