Gazada Al Jazeera tilshisi qaza tapty: telearna Izraıldi qatań aıyptady
ASTANA. KAZINFORM — Al Jazeera telearnasy Gaza sektorynda Izraıl jasaǵan soqqy saldarynan óziniń palestınalyq jýrnalısiniń qaza tabýyn aıyptap, ony «ádeıi jáne nysanaly túrde jasalǵan qylmys» dep atady. Bul týraly VVS jazdy.
Al Jazeera Mubasher telearnasynyń tilshisi Muhammed Ýıshah pen taǵy bir adam sársenbi kúni Gaza qalasynda avtokólikke jasalǵan dron soqqysy saldarynan qaza tapty. Bul týraly Qatarda ornalasqan telearna men jergilikti densaýlyq saqtaý organdary habarlady.
Izraıl áskeri Ýıshahty «HAMAS sodyry» dep atap, oǵan soqqy jasaýǵa onyń osy aımaqtaǵy áskerı kúshterge qaýip tóndirgeni sebep bolǵanyn málimdedi.
Ázirge Al Jazeera bul málimdemege jedel jaýap bergen joq. Alaıda telearna da, HAMAS qozǵalysy da buǵan deıin Ýıshahtyń bul qarýly toppen baılanysy bar degen aıyptaýlardy joqqa shyǵarǵan.
Jýrnalısterdi qorǵaý komıteti (CPJ) de Ýıshahtyń qaza tabýyn qatań aıyptady. Ol Gaza sektoryndaǵy soǵys bastalǵaly beri qaza tapqan Al Jazeera-nyń on birinshi jýrnalısi boldy. Qazir bul aımaqta Izraıl men HAMAS arasyndaǵy osal bitim alty aı boıy saqtalyp keledi.
Kýágerlerdiń aıtýynsha, Ýıshah qasyndaǵy palestınalyqpen birge Gaza qalasynyń batysyndaǵy jaǵalaý jolymen kólikpen kele jatqan kezde ızraıllik dronnan atylǵan zymyran kólikke dál tıgen. Oqıǵadan keıin ınternette taraǵan vıdeolarda avtokóliktiń jalynǵa oranǵany kórinedi.
Aıta keteıik, byltyr Izraıl Al Jazeera telekompanııasynyń bes qyzmetkerin óltirgenin jazdyq.
Sondaı-aq Gazada sý tasymaldaýshy kólik júrgizýshileri qaza tapty. ıÝNISEF shuǵyl tergeý júrgizýdi talap etti.
