Ál-Farabıdiń 1150 jyldyǵyna oraı Almatyda ǵylymı ortalyq ashyldy
Sharaǵa belgili ǵalymdar, jazýshylar, memleket jáne qoǵam qaıratkerleri, shet elderdiń Bas konsýldyqtarynyń ókilderi, JOO stýdentteri, kitaphana oqyrmandary jáne BAQ ókilderi qatysty.
Ál-Farabı ǵylymı ortalyǵynyń maqsaty – Shyǵystyń uly ustazy, fılosof, erte ortaǵasyrlyq entsıklopedıst-ǵalym Ábý Nasyr ál-Farabıdiń rýhanı jáne ǵylymı murasyn ulyqtaý, kópshilikke taratý.
Ǵylymı ortalyq kitaphana qorynan ál–Farabı shyǵarmalarynan jáne ol týraly materıaldardan ashyq qoljetimdi kórme usynady. Onda ál-Farabıdiń ómiri men shyǵarmashylyǵy týraly materıaldar, fılosoftyń eńbekteri jáne onyń álem halyqtarynyń túrli tilderine aýdarylǵan dúnıeleri, belgili otandyq jáne sheteldik ǵalymdardyń, fılosoftardyń, tarıhshylardyń zertteýleri, elektrondyq basylymdar, merzimdi basylymdardan alynǵan qujattardyń derek qory, eńbekteriniń jınaǵy bar. Ortalyq qory únemi jańa basylymdarmen jáne materıaldarmen tolyqtyrylatyn bolady.
«QR Ulttyq kitaphanasyndaǵy ál-Farabı ǵylymı ortalyǵy oıshyldyń ǵylymı eńbekteriniń murasyn tereń zerdeleýge jáne kópshilik is-sharalardy ótkizýge múmkindik beredi. Sondaı-aq, ortalyqta belgili farabıtanýshy ǵalymdarmen, akademıktermen kezdesýler uıymdastyrý, taqyryptyq konkýrstar, ekskýrsııalar ótkizý, ál-Farabı týraly fılmder kórsetý jáne t.b. is-sharalar ótkizýge jaǵdaı jasalady», – deıdi Ulttyq kitpahana dırektory Baqytjamal Ospanova.
Shara barysynda qatysýshylar ál-Farabı eńbekterine keńinen toqtalyp, onyń ómirshendigin tilge tıek etti.
«Ál-Farabı Arıstotelden keıingi dúnıe júzi bilimi men mádenıetiniń ekinshi ustazy atanǵan danyshpan, entsıklopedıst ǵalym, astronomııa, astrologııa, matematıka, logıka, mýzyka, medıtsına, tabıǵattaný, sotsıologııa, lıngvıstıka, poezııa, rıtorıka, fılosofııa ǵylymdaryn meńgerip, 200-ge jýyq traktattar jazǵan. Ál – Farabıdi áli de zertteý qajet. Ol qupııaǵa toly tulǵa», – dedi Ábsattar Derbisáli.
Qazaqstan ál-Farabıdiń 1150 jyldyǵyn merekeleýdi resmı túrde 29 qańtar kúni bastady.
