Ál-Farabıdegi jol apaty: jábirlenýshiler advokattan bas tartty
ALMATY. KAZINFORM — Almatynyń Ál-Farabı dańǵylynda bolǵan jantúrshigerlik jol apatynan qaza tapqan Mercedes júrgizýshisiniń jaqyndary sotta olardyń múddesin qorǵaǵan advokattardyń qyzmetinen bas tartty.
Bul týraly zańger Anna Chernova óziniń áleýmettik jelidegi paraqshasynda málimdedi.
— Ál-Farabı dańǵylynda adam ólimine ákelgen jol apaty boıynsha múddesin tegin qorǵaǵan jábirlenýshi tarap bizdiń qyzmetimizden bas tartty. Biz bul sheshimdi qurmetteımiz jáne kórsetilgen senim úshin alǵys aıtamyz, — dep atap ótti ol.
Qorǵaýshynyń jazbasynda bul sheshimdi qabyldaýǵa ne sebep bolǵany atalmaǵan.
Buǵan deıin apattan qaza tapqan 2003 jylǵy boıjetken K.-niń anasy da advokat qyzmetinen bas tartqan bolatyn.
Atalǵan is Almaty qalasynyń qylmystyq ister jónindegi mamandandyrylǵan aýdanaralyq sotynda sýdıa Erkin Maıshınovtyń tóraǵalyǵymen qaralyp jatyr. Aıyptalýshy oryndyǵynda — 32 jastaǵy kásipker Aleksandr Pak otyr. Oǵan QR Qylmystyq kodeksiniń 345-baby 4-bóligi (Abaısyzda eki nemese odan da kóp adamnyń ólimine ákep soqqan jol júrisi qaǵıdalaryn buzý) boıynsha aıyp taǵylǵan.
Eske salaıyq, 2026 jylǵy 21 naýryzǵa qaraǵan túni Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Іs boıynsha sot otyrysynda jábirlenýshiler Aleksandr Pakke keshirim berdi.
Sondaı-aq Ál-Farabı dańǵylynda bolǵan jol apatynyń beınejazbasy sotta kórsetildi.
Oǵan qosa birneshe kýáger sotta jańa derektermen bólisti.
