Ál-Farabıdegi jol apaty: kýáger Zeekr júrgizýshisiniń jaǵdaıyn sıpattady
ALMATY. KAZINFORM — Ál-Farabı dańǵylynda bolǵan jantúrshigerlik jol apatyna baılanysty sot Almatyda ótip jatyr.
Sot otyrysynda oqıǵa ornyna birinshi bolyp jetken polıtsııa qyzmetkerlerinen jaýap aldy. Patrýldik polıtsııa ınspektory Darhan Nurǵalıdyń aıtýynsha, 21 naýryzǵa qaraǵan túni ol áriptesimen birge Ál-Farabı dańǵyly men Nazarbaev kóshesiniń qıylysynda kezekshilikte bolǵan. Túngi saǵat 3-ke taıaý tártip saqshylary qatty soqqynyń dybysyn estip, dereý apat bolǵan jerge qaraı bet alǵan.
— Oqıǵa ornyna birden jettik. Áriptesim jedel járdem shaqyrdy, qasymda bir turǵyn boldy, ekeýlep Zeekr avtokóliginiń ishinen bir adamdy sýyryp aldyq. Ol esin bilip jatty, biraq qoıylǵan suraqtarǵa jaýap bere almady. Denesiniń qaı jeri aýyryp turǵanyn bilgim keldi. Spırttik ishimdiktiń ıisi sezildi me? Shynymdy aıtsam, ol sátte biz alkogoldiń nemese basqa nárseniń ıisin sezetindeı kúıde bolǵan joqpyz. Kóp uzamaı jedel járdem kelip, ony alyp ketti. Kólik múldem qırap qalǵan, aldyńǵy bóligi múldem joq edi, — dedi polıtseı.
Keıin sot qaıǵyly jaǵdaıdyń aldynda ǵana «Ý Afanasıcha» meıramhanasynda Aleksandr Pakpen birge bolǵan basqa da kýágerlerden jaýap aldy. Kýágerlerdiń biri, sottalýshynyń áriptesi, bastapqyda úıde bolǵanyn, biraq keıin dostary dámhanaǵa shaqyrǵanyn aıtty. Aldymen bas tartqanymen, qaıta telefon soqqannan keıin keshki saǵat 22:00 shamasynda olarǵa qosylǵan. Meıramhanaǵa Kia avtokóligimen kelgen, biraq sol sátte onyń júrgizýshi kýáligi bolmaǵan. Buǵan deıin ol 7 jylǵa kólik basqarý quqyǵynan aıyrylǵan jáne bul shekteý merzimi ol kezde áli aıaqtalmaǵan eken.
Sondaı-aq ol 4 jyl buryn kólik júrgizý quqyǵynan aıyrylǵan kezeńde mashına basqarǵany, sonymen qatar qos tutas syzyqty kesip ótip, qarsy baǵytqa shyqqany úshin ákimshilik jaýapkershilikke tartylǵanyn moıyndady.
Jábirlenýshi tarap advokatynyń «Zań buzýshylyq jasaý kezinde sizde mundaı jazasyzdyq sezimin kim qalyptastyrdy?» degen suraǵyna kýáger naqty jaýap bere almady.
— Maǵan eshkim mundaı senim bergen joq. Shyn máninde quqyq buzýshylyq jasaıyn degen oıym bolmaǵan. Biraq zańdy buzǵanym ras, — dedi ol.
Qos tutas syzyqty kesip ótýge qatysty naqtylaý suraǵyna ol kólikterdiń arasynda neshinshi bolyp shyqqany esinde joqtyǵyn aıtyp, bul aýdandy nashar biletindikten, tek aldyndaǵy mashınalardyń sońynan ilese bergenin jetkizdi.
Ekinshi kýáger jaýap alý barysynda Pakty 2016 jyldan beri tanıtynyn atap ótti. Ol da dostarymen birge demalǵanyn, biraq eshqandaı ishimdik ishpegenin málimdedi. Keıin olar meıramhanadan birge BMW M5 kóligimen ketken. Onyń aıtýynsha, ol dámhanadan tórtinshi nemese besinshi bolyp — kólik tizbeginiń ortasynda shyqqan. Odan ári olar Dostyq dańǵylymen júrip, keıin Ál-Farabıge burylyp, kópirdiń astynan keri aınalǵan.
Meńdiqulov kóshesine taıaǵanda ol jol apatynyń saldaryn kórip, zardap shekkenderge kómektesý úshin toqtaǵan. Bul ýaqytta adamdar jınala bastap, polıtsııa da jetken eken. Ol apatqa ushyraǵandar óziniń tanystary bolýy múmkin dep múldem oılamaǵan.
— Sodan keıin biz ketip qaldyq. Qasymda meıramhanada birge bolǵan bir qyz otyrdy. Biz Esentaı jaqqa qaraı bet aldyq. Keıin maǵan telefon soǵyp, bul bizdiń dostarymyz ekenin aıtty. Men birden artqa buryldym. Nazarbaev kóshesiniń boıyna kóligimdi tastap kettim, óıtkeni jol jabylǵan edi. Meńdiqulov kóshesine qaraı júgirip baryp, jedel járdem kóliginiń ishinen dosymdy kórdim. Men de ishine otyrdym, sodan soń aýrýhanaǵa birge bardyq. Ol eshteńe aıtpady, eseńgirep qalǵan, beti-aýzy, erinderi qan-josa bolatyn, — dedi ol.
Odan bólek ol meıramhanadan shyǵar tusta tutas syzyqtan burylyp, jol júrý erejesin buzǵanyn ashyq aıtty. Osy áreketi úshin ol aıyppul arqalap, júrgizýshi kýáliginen aıyrylǵan.
— Ýaqyt túngi saǵat úsh-tórt shamasy edi. Kóshe jym-jyrt, múldem bos boldy. Úıge tezirek jetkimiz kelip, joldy qysqartpaqshy boldyq, — dedi kýáger.
Eske salaıyq, buǵan deıin Ál-Farabıde dańǵylynda bolǵan jol apatynyń beınejazbasy sotta kórsetildi. Sondaı-aq kýáger Adam Marhıevten jaýap alyndy.
Sondaı-aq birneshe kýáger sotta jańa derektermen bólisti.
Odan bólek búgingi sot otyrysynda úshinshi jábirlenýshi de Pakke keshirim berdi.
Buǵan deıin sotta taǵy eki jábirlenýshi aıyptalýshyǵa keshirim bergen bolatyn.
2026 jylǵy 21 naýryzǵa qaraǵan túni Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.
