Ál-Farabıdegi jol apaty boıynsha sottalǵan Aleksandr Paktyń isi apellıatsııalyq sotta qaraldy
ALMATY. KAZINFORM – Almaty qalalyq sotynda Aleksandr Paktyń isi boıynsha apellıatsııalyq shaǵym qaraldy.
Apellıatsııalyq sot otyrysy 5 tamyzda ótti. Shaǵymdy jol apatynda qaza tapqan qyzdyń ákesi túsirgen. Ol moraldyq zııandy óteý ótemaqysyn 10 mıllıonnan 100 mıllıon teńgege deıin ulǵaıtýdy surady.
– Shaǵymda zardap shekken tarap Almaty qalasynyń Qylmystyq ister jónindegi mamandandyrylǵan aýdanaralyq sotynyń 2026 jylǵy 22 maýsymdaǵy №7598-26-00-1/42 qylmystyq is boıynsha úkimin azamattyq talapty sheshý bóliginde ózgertýdi, Aleksandr Paktan onyń paıdasyna 100 000 000 (júz mıllıon) teńge mólsherinde moraldyq zııan ótemaqysyn óndirip alýdy suraıdy, – delingen sot qaýlysynda.
Іs materıaldary boıynsha marqumnyń ákesi Paktyń aıyptylyǵy, onyń is-áreketteriniń saralanýy jáne taǵaıyndalǵan qylmystyq jaza týraly qorytyndylaryna shaǵymdanbaǵan.
Óz kezeginde Aleksandr Paktyń tarapy apellıatsııalyq shaǵymdy qanaǵattandyrýsyz qaldyrýdy surady. Sot alqasy úkimdi ózgertýge eshqandaı negiz joq degen qorytyndyǵa keldi. Sotta moraldyq zııan ótemaqysy ottalǵan adamnyń jazasyn qatańdatý tásili retinde qarastyrylmaıtyny atap ótildi.
– Ótemaqy mólsherin belgileý kezinde birinshi ınstantsııadaǵy sot materıaldyq quqyq normalaryn qate qoldandy nemese qylmystyq-protsestik zań normalaryn eleýli túrde buzdy dep esepteýge sot alqasy eshqandaı negiz tappady. Óndirilgen 10 000 000 teńge mólsherindegi ótemaqy somasy zardap shekken tararqa keltirilgen rýhanı qasirettiń sıpatyna, jasalǵan qylmystyq quqyq buzýshylyqtyń mán-jaılaryna, sottalǵan adamnyń aıyp dárejesine sáıkes keledi ári parasattylyq pen ádildik talaptaryna jaýap beredi, – delingen sot qaýlysynda.
Nátıjesinde Almaty qalasynyń Qylmystyq ister jónindegi mamandandyrylǵan aýdanaralyq sotynyń 2026 jylǵy 22 maýsymdaǵy úkimi ózgerissiz qaldyryldy.
Eske salaıyq, 2026 jylǵy 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty. Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.
Іs boıynsha sot otyrysynda jábirlenýshiler Aleksandr Pakke keshirim berdi.
Sondaı-aq sotta aıyptalýshy Aleksandr Paktan jaýap alyndy.
Keıin jol apaty boıynsha sotta iske jańa jábirlenýshi qosylyp, ol sottalýshyǵa eshqandaı keshirim bermeıtinin atap ótti.
Bıyl 22 maýsymda sot Aleksandr Pakti QR Qylmystyq kodeksiniń 345-1-baby boıynsha kináli dep tanylyp, 10 jylǵa bas bostandyǵynan aıyryldy. Sondaı-aq sottalýshy Pak ómir boıyna júrgizýshi kýáliginen (kólik basqarý quqyǵynan) aıyryldy. Qaza tapqan qyzdyń ákesine tıesili talap aryz ishinara qanaǵattandyrylyp, 10 mıllıon teńge kóleminde ótemaqy belgilendi.
