Ál-Farabıdegi jol apaty boıynsha sot: Zeekr júrgizýshisi sońǵy sózin aıtty
ALMATY. KAZINFORM — Ál-Farabı dańǵylynda bolǵan jol apaty baılanysty sotta jaryssóz ótti.
Sot otyrysynda aıyptalýshy Aleksandr Pak sońǵy sózin aıtyp, ózine qatysty zańdy sheshim shyǵarýdy surady.
— Men kináni basqa bireýge ysyryp tastaýǵa tyryspaımyn. Kún saıyn meniń kesirimnen adamdardyń qaza tapqanyn bilip, sonyń saldarymen ómir súrip kelemin. Bul — men úshin júrýge eń aýyr nárse. Meniń kesirimnen talaı adamnyń ómiri talqandaldy. Jábirlenýshiler balalarynan aıyryldy. Meniń de otbasym zardap shekti. Men tergeý men sot talqylaýynan eshqashan jaltarǵan emespin. Sottan meni aqtaýdy suramaımyn. Tek zańdy sheshim shyǵarýdy ótinemin. Men buǵan deıin eshqashan qylmystyq jaýapkershilikke tartylmaǵanmyn jáne mundaı jaǵdaı týyndaıdy dep oılamadym. Qaza tapqandardyń ata-analarynan taǵy da keshirim suraımyn, — dep málimdedi aıyptalýshy.
Sondaı-aq ol 20 jasynan bastap jumys istep, bárine óz kúshimen jetken qarapaıym jigit ekenin aıtty.
— Men mıllıonerlerdiń uly emespin, saıası sheneýniktermen baılanysym nemese tanystarym joq. Kórgen kúnim de, tapqan tabysym da — adal eńbegimniń jemisi. Bolashaqtaǵy jalǵyz maqsatym — japa shekken otbasylar úshin dos bolyp, kómek kórsetý, — dedi sottalýshy.
Sottalýshynyń advokaty sottan zańdy sheshim qabyldaýdy surady, alaıda jol apaty kezinde júrgizýshiniń alkogoldik mas kúıde bolmaǵanyn alǵa tartyp, aıyptaý babyn ózgertýdi talap etti. Sýdıa úkimdi jarııalaý úshin keńesý bólmesine ketti.
Eske salaıyq, búgin jaryssózde prokýror Aleksandr Pakty 10 jyl bas bostandyǵynan aıyrýdy surady.
2026 jylǵy 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty. Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.
Іs boıynsha sot otyrysynda jábirlenýshiler Aleksandr Pakke keshirim berdi.
Sondaı-aq Ál-Farabıde dańǵylynda bolǵan jol apatynyń beınejazbasy sotta kórsetildi.
Birneshe kýáger sotta jańa derektermen bólisti.
Sondaı-aq sotta aıyptalýshy Aleksandr Paktan jaýap alyndy.
Keıin jol apaty boıynsha sotta iske jańa jábirlenýshi qosylyp, ol sottalýshyǵa eshqandaı keshirim bermeıtinin atap ótti.
