Ál-Farabıdegi jol apaty boıynsha sot: úshinshi jábirlenýshi keshirim berdi
ALMATY. KAZINFORM – Ál-Farabı dańǵylynda bolǵan jol-kólik oqıǵasyna qatysty sot otyrysy Almatyda ótip jatyr.
Almaty qalasynyń qylmystyq ister jónindegi mamandandyrylǵan aýdanaralyq sotynda qaralyp jatqan iske sýdıa Erkin Maıshınov tóraǵalyq etip jatyr. Aıyptalýshy oryndyǵynda 32 jastaǵy kásipker A.P. otyr. Oǵan QR Qylmystyq kodeksiniń 345-baby 4-bóligi (abaısyzda eki nemese odan da kóp adamnyń ólimine ákep soqqan is-áreket) boıynsha aıyp taǵylǵan.
Búgingi sot otyrysynda jol apaty kezinde mert bolǵan 22 jastaǵy T.K. týystaryna sóz berildi. Marqumnyń anasy A.E. qyzy týraly qaıǵyly habardy 21 naýryz kúni tańerteń alǵanyn aıtty. Osydan keıin ol máıitti taný úshin máıithanaǵa barǵan. Sotta onyń sotqa joldaǵan jáne óz qolymen qol qoıǵan jazbasha ótinishi de oqyldy. Onda sottalýshynyń óz kinásin tolyq moıyndap, shyn júrekten ókingeni, keshirim suraǵany jáne keltirilgen materıaldyq ári moraldyq shyǵyndy tolyq kólemde ótegeni aıtylǵan.
Osyǵan baılanysty qaza tapqan qyzdyń anasy sottalýshyǵa eshqandaı talap-aryzy joqtyǵyn málimdep, oǵan bas bostandyǵynan aıyrýmen baılanysty emes jaza taǵaıyndaýdy surady. Sonymen birge, otyrys barysynda ol jaza sharasy týraly túpkilikti sheshimdi sottyń qaraýyna qaldyratynyn atap ótti.
Eske salaıyq, ótken sot otyrysynda taǵy eki jábirlenýshi aıyptalýshyǵa keshirim bergen bolatyn.
Buǵan deıin Almaty polıtsııa departamenti bul qylmystyq is boıynsha sotqa deıingi tergeýdiń aıaqtalǵanyn habarlaǵan edi.
Eske salaıyq, 2026 jylǵy 21 naýryzǵa qaraǵan túni Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.
