Ál-Farabıdegi jol apaty boıynsha sot: iske jańa jábirlenýshi qosyldy
ALMATY. KAZINFORM — Almatyda Ál-Farabı dańǵylynda bolǵan jol-kólik oqıǵasyna qatysty sot otyrysy ótip jatyr.
Búgingi sot otyrysynda sýdıa Mercedes avtokóliginde qaza tapqan qyzdyń ákesin jábirlenýshi dep tanydy. Er adam burynǵy áıeliniń aıyptalýshyǵa keshirim bergenin estigennen keıin sot protsesine aralasýǵa sheshim qabyldaǵan. Ol 19 jasar qyzyn ózi ósirip, baǵyp-qaqqanyn jáne jerleý rásimin de ózi uıymdastyrǵanyn atap ótti.
Al Aleksandr Paktyń advokaty er adamnyń buǵan deıin sottalýshynyń Tarazdaǵy ata-anasyna baryp qaıtqanyn aıtyp, bul áreketti «quqyqty asyra paıdalaný» dep atady jáne ótinishti qanaǵattandyrmaýdy surady.
Marqumnyń ákesi burynǵy áıelimen 2018 jyly ajyrasyp ketkenin, biraq soǵan qaramastan qyzyn ózi tárbıelep, aıalap ósirgenin atap ótti. Sondaı-aq jer qoınyna ekinshi perzentin tapsyrýǵa májbúr bolǵanyn aıtyp, kózine jas aldy. Aıtýynsha, birinshi qyzy sábı kezinde shetinep ketken eken.
Ol burynǵy áıeliniń apatqa kináli taraptan ótemaqy alyp, keshirim bergeni týraly jańalyq onyń tóbesinen jaı túskendeı áser etkenin málimdedi. Er adam qyzynyń anasy bul qadamǵa basqa balalarynyń bolashaǵy úshin bardy dep sanaıdy, biraq ózi sottalýshyǵa eshqandaı keshirim bermeıtinin atap ótti.
— Men ony ózim baǵyp-qaqtym, tárbıeledim, janymdaı jaqsy kórdim. Qyzym meniń burynǵy áıelimmen tatýlasqanymdy qatty qalady, sońǵy ýaqytta burynǵy jubaıymmen qarym-qatynasymyz shynymen de rettele bastaǵan edi. Úsh aıdan beri uıqydan qaldym, — dedi er adam.
Eske salaıyq, 2026 jylǵy 21 naýryzǵa qaraǵan túni Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty. Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.
Іs boıynsha sot otyrysynda jábirlenýshiler Aleksandr Pakke keshirim berdi.
Sondaı-aq Ál-Farabıde dańǵylynda bolǵan jol apatynyń beınejazbasy sotta kórsetildi.
Birneshe kýáger sotta jańa derektermen bólisti.
Sondaı-aq sotta 32 jastaǵy aıyptalýshy Aleksandr Paktan jaýap berdi.
