Ál-Farabıdegi jol apaty boıynsha sot: prokýror 10 jyl jaza surady
ALMATY. KAZINFORM — Ál-Farabı dańǵylynda bolǵan jol apaty baılanysty sot Almatyda ótip jatyr.
Búgin sottyń jaryssózi bastaldy. Іske qatysqan prokýror 32 jastaǵy sottalýshy Aleksandr Pakty 10 jyl bas bostandyǵynan aıyrýdy surady.
— Jol-kólik oqıǵasyna qatysty keshendi sot saraptamasynyń qorytyndysyna erekshe nazar aýdarǵym keledi. Saraptama tujyrymyna sáıkes, soqtyǵysý aldynda kóliktiń qozǵalys jyldamdyǵy saǵatyna shamamen 115 shaqyrymdy quraǵan. Qala jaǵdaıynda, túnde jáne alkogoldik mas kúıinde kólikti mundaı jyldamdyqpen basqarýdy jaı ǵana abaısyzdyq dep baǵalaýǵa bolmaıdy. Bul — jol qozǵalysynyń barlyq qatysýshylary úshin sanaly túrde ólim qaýpin týdyrý. Osylaısha, sottalýshynyń kólikti mas kúıinde basqarǵany, jol júrý erejesin buzǵany jáne abaısyzdyqtan jábirlenýshilerdiń ólimine sebepshi bolǵany sot otyrysynda zerttelgen dáleldermen tolyq rastaldy, — dedi prokýror.
Eske salaıyq, 2026 jylǵy 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty. Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.
Іs boıynsha sot otyrysynda jábirlenýshiler Aleksandr Pakke keshirim berdi.
Sondaı-aq Ál-Farabıde dańǵylynda bolǵan jol apatynyń beınejazbasy sotta kórsetildi.
Birneshe kýáger sotta jańa derektermen bólisti.
Sondaı-aq sotta aıyptalýshy Aleksandr Paktan jaýap alyndy.
Keıin jol apaty boıynsha sotta iske jańa jábirlenýshi qosylyp, ol sottalýshyǵa eshqandaı keshirim bermeıtinin atap ótti.
