Ál-Farabıdegi jol apaty boıynsha sot: kýágerler jańa derektermen bólisti

Búgin sot otyrysynda birneshe kýáger jaýap berdi. Olardyń biri Áıgerim Ábdiraıymova óz túsiniktemesinde dámhanaǵa keshki saǵat 21:30–22:00 shamasynda qurbysynyń shaqyrtýymen barǵanyn aıtty. Ol ústel basyndaǵy basqa adamdarmen sol keshte bir-aq tanysqan. Dámhanada 1,5 saǵattaı bolǵan boıjetken otyrystaǵy áńgimeler kóńilinen shyqpaǵan soń, taksımen ketip qalǵan.

Sýsyndar týraly suraqqa kýáger ózine aperol kokteılin, al qurbysyna sharap tapsyrys bergenin aıtty. Sonymen qatar ol basqalardyń ishimdik ishkenin baıqamaǵanyn atap ótti. Jol apaty týraly tańerteń qurbysynan estigen. Boıjetken aıyptalýshy Pak erekshe esinde qalmaǵanyn jáne onyń alkogoldik sýsyn ishkenin kórmegenin málimdedi.

Taǵy bir kýáger Orazǵalı Omar Aleksandr Pakty sol keshte alǵash ret kórgenin aıtty. Ol dámhanaǵa túngi saǵat 01:30 shamasynda dosynyń shaqyrýymen barǵan. Onyń sózinshe, ústel basynda 6 adam bolǵan, biraq ózi ishimdik ishpegendikten, ózgelerdiń ne ishkenine nazar aýdarmaǵan.

— Ol jerde úlken ústel boldy. Olardy baqylap otyrýdyń esh máni bolmady, óıtkeni eshqaısysyn tanymaıtyn edim, — dep túsindirdi ol sotta.

Kýáger bul toptyń dámhanada túngi saǵat úshke deıin otyrǵanyn, sodan keıin Ál-Farabı dańǵylyna qaraı bet alǵanyn aıtty. Alaıda meıramhana esebin kim tólegenin bilmeıtinin jetkizdi.

Sondaı-aq Omar óziniń jeke júrgizýshisi bar BMW X7 avtokóligimen júrgenin, keıinnen sol júrgizýshi qosarlanǵan tutas syzyqty kesip ótkeni úshin 6 aıǵa júrgizýshi kýáliginen aıyrylǵanyn habarlady. Onyń aıtýynsha, olardyń aldynda júrgen taǵy eki kólik — BMW men Camry de dál osylaı ereje buzǵan. Omar júrgizýshige qosarlanǵan tutas syzyqtan ótýdi ózi ótingenin moıyndap, muny «jastyq» dep túsindirdi.

Kýáger Aleksandr Paktyń kóligin baıqamaǵanyn jáne apat sátin óz kózimen kórmegenin aıtty.

— Ózim Asqarov kóshesiniń boıynda turamyn, sol jaqqa qaraı bara jatqanmyn. Jol apatynyń qalaı bolǵanyn kórmedim, — dedi ol.

Kýáger retinde jaýap bergen Nazygúm Shamahýnova sotta Aleksandr Paktyń dosymen apattan 1-1,5 apta buryn tanysqanyn, keıin Pakpen de tanysyp, biraq jaqyn aralaspaǵanyn aıtty.

Onyń sózinshe, qaıǵyly oqıǵa bolǵan kúni ol tanysymen keshki as ishýge kelisken. Ony tanysy Zeekr avtokóligimen úıinen alyp ketken. Dámhanada boıjetken tiskebasar men bir bokal aq sharapqa tapsyrys bergen. Ol basqa adamdardyń ishimdik ishken-ishpegenine bilmeıtinin aıtty.

— Daıashy jıi kelip-ketip júrdi… Men qurbymmen sóılesip otyrǵandyqtan, nazar aýdarmadym, — dedi boıjetken.

Boıjetkenniń sózinshe, ol Pakpen jeke sóılespegen jáne onyń ishimdik ishkenin kórmegen. Otyrys aıaqtalǵan soń jurt taraı bastaǵan. Kólik turaǵynda Aleksandr Pak aldymen ony úıine aparyp tastaýdy usynǵan, biraq keıinnen aınyp qalyp, basqa tanysynyń kóligine otyrýdy ótingen.

Kýágerdiń aıtýynsha, bári kólikterimen júre bastaǵanda, Pak turaqtan birinshi bolyp shyǵyp ketken. Al bular otyrǵan kólik tizbekte tórtinshi nemese besinshi bolyp qozǵalǵan. Odan ári olar Dostyq dańǵylymen júrip, Ál-Farabıge qaraı burylǵan kezde jol apaty bolǵanyn baıqaǵan.

— Men muny kórdim. Óte qorqynyshty kórinis edi, zárem ushty, — dedi ol.

Boıjetken apatqa ushyraǵan kóliktiń Pakqa tıesili ekenin birden túsinbegenin aıtty: ol jerden tek Mercedes kóligin baıqap, Zeekr-di kórmegen. Óıtkeni qatty soqqydan kólik óte alysqa ushyp ketken.

Eske salaıyq, buǵan deıin Ál-Farabı dańǵylynda bolǵan jol apatynyń beınejazbasy sotta kórsetildi. Sondaı-aq kýáger Adam Marhıevten jaýap alyndy.

Odan bólek búgingi sot otyrysynda úshinshi jábirlenýshi de Pakti keshirdi.

Ótken sot otyrysynda taǵy eki jábirlenýshi aıyptalýshyǵa keshirim bergen bolatyn.

2026 jylǵy 21 naýryzǵa qaraǵan túni Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty. Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.