Ál-Farabıdegi qaıǵyly oqıǵa: Sotta jol apatynyń beınejazbasy kórsetildi

Sot otyrysy barysynda beınebaqylaý kameralary túsirgen beınejazbalar kórsetildi. Kadrlardan avtokóliktiń Ál-Farabı dańǵylymen joǵary jyldamdyqpen kele jatyp, qarsy qozǵalys jolaǵyna shyǵyp ketkenin jáne basqa kólikpen soqtyǵysqanyn kórýge bolady.

Sondaı-aq sotqa «Ý Afanasıcha» meıramhanasynyń turaǵynan túsirilgen jazba usynyldy. Іs materıaldaryna sáıkes, jol apatyna deıin sottalýshy Pak dostarymen birge osy jerde demalǵan. Beınejazbada túngi saǵat 03:31–de turaqtan 6 avtokóliktiń Dostyq dańǵyly boıymen Ál-Farabıge qaraı shyqqany kórinedi. Olar jol erejelerin buzyp, qos tutas syzyqty kesip ótken.

Sot barysynda aıyptalýshymen birge qaıǵyly oqıǵa aldynda birge bolǵan tanystarynan jaýap alyndy. Atap aıtqanda, kýáger Adam Marhıev 20 naýryz kúni keshke, shamamen saǵat 20:00–de Abylaı han — Qurmanǵazy kósheleriniń qıylysynda Nıkolaı esimdi dosymen kezdesip, «Ý Afanasıcha» dámhanasyna barǵanyn aıtyp berdi.

— Otyryp, tamaqtandyq. Tanystar kóp boldy. Men taksı shaqyrtyp, shamamen saǵat 00:00–de úıge qaıtyp kettim. Ústel basynda 5 shaqty adam otyrdyq, olardyń arasynda Aleksandr Pak ta bar edi. Ondaǵylardyń bárin birdeı tanı bermeımin. Bul jaı ǵana dostar arasynda kezdesý boldy, erekshe eshteńe joq. Men steık pen kola aldym. Paktyń ne tapsyrys bergeni esimde joq. Men eń kesh degende túngi 00:00 men 00:15–tiń arasynda ketip qaldym. Tańerteń saǵat 9-da oıanǵanymda, dostarymnyń jazǵanyn kórdim. Qaıta qońyraý shalǵanymda maǵan jol-kólik oqıǵasy bolǵanyn aıtty. Sodan keıin aýrýhanaǵa baryp, mán-jaıdy bildim. Onda jarty saǵattaı turyp, kómegimdi usyndym. Tanystar men týystar jınalyp qalypty. Oqıǵanyń qalaı bolǵanyn naqty bilmedim, maǵan shamalap túsindirdi, — dedi ol prokýror men advokattardyń suraqtaryna jaýap bere otyryp.

Kýágerdiń aıtýynsha, ol kezdesý kezinde ishimdik ishilgenin kórmegen jáne ústel ústinen de spırttik sýsyndardy baıqamaǵan. Sondaı-aq ol Aleksandr Pakty bir jarym jyldaı ýaqyttan beri tanıtynyn aıtyp, ony «jaýapty, ádil ári adal adam» dep sıpattady jáne onyń tarapynan eshqandaı jaǵymsyz qylyqtar kórmegenin atap ótti.

Eske salaıyq, búgingi sot otyrysynda úshinshi jábirlenýshi de Pakti keshirdi.

Ótken sot otyrysynda taǵy eki jábirlenýshi aıyptalýshyǵa keshirim bergen bolatyn.

2026 jylǵy 21 naýryzǵa qaraǵan túni Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.

Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.