Ál-Farabı týraly fılm túsirilmek

NUR-SULTAN. QazAqparat – Parlament Senatynyń depýtaty Álimjan Qurtaev «ál-Farabı izderimen» atty respýblıkalyq ǵylymı-zertteý ekspedıtsııasynyń quramynda Túrkııa, Lıvan jáne Sırııa elderinde saparda boldy. Bul týraly QazAqparat Senattyń baspasóz qyzmetine silteme jasap habarlaıdy.

«Rýhanı jańǵyrý» baǵdarlamasy jáne Elbasynyń «Uly dalanyń jeti qyry» atty maqalasyna oraı júzege asatyn sharalar boıynsha 2020 jyly Shyǵystyń uly oıshyly ál-Farabıdiń 1150 jyldyǵyn ıÝNESKO aıasynda atap ótý josparlanǵan bolatyn.

Qazaq ulttyq ýnıversıteti ǵulama ǵalymnyń 1150 jyldyǵyna daıyndyq aıasynda medıakompanııalarmen birlese otyryp, ál-Farabıdiń ómiri men qyzmetine arnalǵan birneshe derekti fılm túsirýdi qolǵa aldy. Qazirgi kezde ál-Farabı týraly «Ustazdyń oralýy» tórtinshi derekti fılmi boıynsha jumystar atqarylýda. Bizdiń elimizdiń farabıtanýshy jetekshi ǵalymdary, qoǵam jáne mádenıet qaıratkerleri quramyna engen arnaıy ǵylymı-zertteý ekspedıtsııasy «ál-Farabı izderimen» fılmin túsirý maqsatynda kıno túsirý jumystaryn bastap ketti.

Ońtústik Qazaqstan oblysyndaǵy Otyrar aýdanynyń ákimi bolǵan kezde tarıhı-ólketaný murajaıynyń qurylysyn salýǵa, ál-Farabıdiń eskertkishin ashýǵa jáne ejelgi Otyrardaǵy arhelogııalyq qazba jumystaryn jandandyrýǵa yqpal etken Parlament Senatynyń depýtaty Álimjan Qurtaev ekspedıtsııa quramyna engen bolatyn.