Ál-Farabı murasy halyqaralyq sımpozıýmda talqylanyp jatyr — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
China Southern Airlines pen Air Astana birlesken bıznes qurý týraly kelisimge qol qoıdy — «Halyq gazeti»
China Southern Airlines pen Air Astana áýe kompanııalary 30 qazanda Astanada birlesken bıznes qurý jónindegi yntymaqtastyq kelisimine qol qoıdy. Qujatqa sáıkes, taraptar qoldanystaǵy kod-sherıng seriktestigin keńeıtip, ushý kestelerin ońtaılandyrýdy jáne áýe baǵyttary boıynsha yntymaqtastyqty kúsheıtýdi kózdep otyr, dep habarlaıdy Halyq gazeti basylymy.
Atap aıtqanda, birlesken reıster aıasyn eki el arasyndaǵy ishki baǵyttardan úshinshi memleketterge qatynaıtyn reısterge deıin keńeıtý josparlanǵan. Bul Qytaıdan Ózbekstan men Qyrǵyzstanǵa, sondaı-aq Qazaqstannan Vetnam men Taılandqa qatynaıtyn jolaýshylarǵa qosymsha múmkindik beredi.
Sonymen qatar áýe kompanııalary tranzıttik saparlardy jeńildetý úshin biryńǵaı bılet rásimdeý jáne bagajdy sońǵy mejeli jerge deıin tikeleı jetkizý qyzmetterin engizýdi josparlap otyr. Qazaqstan Respýblıkasy kólik vıtse-mınıstri Talǵat Lastaevtyń aıtýynsha, búginde Qazaqstan men Qytaı arasynda 21 áýe baǵyty boıynsha reıster oryndalady. Bıyl eki el arasyndaǵy jolaýshylar aǵyny 1 mıllıon adamnan asqan. Onyń atap ótýinshe, jańa kelisim áýe qatynasyn odan ári damytýǵa jáne jolaýshylarǵa qolaıly jaǵdaı jasaýǵa yqpal etedi.
Sonymen qatar osy aptada Halyq gazetinde «Almatyda Qytaı jáne Qazaqstan sýretshileriniń halyqaralyq kórmesi ashyldy» degen taqyryptaǵy aqparat jaryq kórdi.
Qytaılyq BAQ-tyń málimetinshe, Almaty qalasyndaǵy Ábilhan Qasteev atyndaǵy Qazaqstan Respýblıkasynyń Ulttyq óner mýzeıinde «Jibek jolynyń sheksiz bulttary. «Bir beldeý, bir jol»: Almaty beketi» atty halyqaralyq kórme ashyldy. Mýzeı men Shanhaı óner kollektsııasy mýzeıiniń (SACM) birlesip uıymdastyrýymen ótken kórmege Qytaı jáne Qazaqstan sýretshileriniń týyndylary qoıylǵan. Halyqaralyq joba buǵan deıin 2024 jyly Tegeranda, 2025 jyly Tashkentte tanystyrylsa, Almaty ony qabyldaǵan úshinshi qala atandy.
Kórmede Qytaıdyń dástúrli keskindeme óneri, kóne qabyrǵa sýretteriniń naqyshtary men zamanaýı týyndylary, sondaı-aq Ábilhan Qasteev atyndaǵy mýzeı qoryndaǵy qazaqstandyq sýretshilerdiń eńbekteri usynylǵan. Joba eki el arasyndaǵy mádenı baılanystardy nyǵaıtýǵa, mýzeıaralyq yntymaqtastyqty damytýǵa jáne óner murasyn keńinen nasıhattaýǵa baǵyttalǵan. Halyqaralyq kórme 18 qarashaǵa deıin jalǵasady.
Qazaqstan men Úndistan izdeýde júrgen adamdardy ustap berý jóninde kelisti — ÓzA
Qazaqstan men Úndistan izdeýde júrgen adamdardy ustap berý týraly shartqa qol qoıdy.
Qujatqa Qazaqstannyń Bas Prokýrory Berik Asylov pen Úndistannyń Qazaqstandaǵy elshisi Sılas Tangal qol qoıǵan.
Bul týraly ózbekstandyq «ÓzA» aqparat agenttigi «KAZINFORM» halyqaralyq aqparat agenttigine silteme jasap habarlady.
Keltirilgen derekterge súıensek, atalǵan Shart, Taraptardyń quqyq qorǵaý organdary qylmystyq jaýaptylyqqa tartý nemese sot úkimin oryndaý maqsatynda izdestirip júrgen adamdardy ustap berý úshin quqyqtyq negizdi retteıdi jáne ol jasalǵan qylmys úshin jazanyń bultartpastyǵy qaǵıdatyn qamtamasyz etedi.
— Osy halyqaralyq qujat Qazaqstan men Úndistan arasyndaǵy qylmystyq is júrgizý salasyndaǵy sharttyq-quqyqtyq bazanyń qalyptasýyn aıaqtaıdy, óıtkeni eki el arasynda qylmystyq ister boıynsha ózara quqyqtyq kómek jáne sottalǵan adamdardy berý týraly kelisimder buryn qoldanysqa engizilgen, — delingen habarlamada.
«Qadaǵalaý organy basshysynyń aıtýynsha, shart taraptar arasyndaǵy saýda-ekonomıkalyq jáne mádenı-gýmanıtarlyq baǵyttardyń júıeli damýyn eskere otyryp jsalǵan erekshe mańyzǵa ıe qujat», dep jazǵan ózbekstandyq BAQ.
Sondaı-aq osy aptada «ÓzA»-da «Qazaqstan men Ózbekstan qaýipsizdik salasyndaǵy yntymaqtastyqty nyǵaıtady» degen taqyryptaǵy aqparat jarııalandy.
Shymkentte Qazaqstan men Ózbekstan qaýipsizdik keńesteri apparattarynyń segizinshi konsýltatsııalyq kezdesýi ótti. Ózbekstandyq basylym bul aqparatty da «KAZINFORM»-ǵa silteme jasap habarlaǵan. Jıynǵa Qazaqstan Respýblıkasy Qaýipsizdik Keńesi Tóraǵasynyń orynbasary Aıda Balaeva men Ózbekstan Respýblıkasy Prezıdenti janyndaǵy Qaýipsizdik Keńesiniń hatshysy Vıktor Mahmýdov tóraǵalyq etti. Kelissóz barysynda taraptar halyqaralyq terrorızm men dinı ekstremızmge, jastardyń radıkaldanýyna, uıymdasqan qylmysqa, esirtkiniń zańsyz aınalymyna, zańsyz kóshi-qon men kıberqylmysqa qarsy is-qımyl máselelerin talqylady. Sondaı-aq tsıfrlyq tehnologııalar men jasandy ıntellektige baılanysty jańa qaterler, sý jáne ekologııalyq qaýipsizdik, transshekaralyq sý resýrstaryn tıimdi paıdalaný máseleleri qaraldy. Kezdesý qorytyndysy boıynsha Aıda Balaeva men Vıktor Mahmýdov tıisti hattamaǵa qol qoıyp, onyń oryndalýyn qamtamasyz etý úshin birlesken sarapshylar tobyn qurýǵa ýaǵdalasty. Budan bólek, delegatsııa basshylary eki el arasyndaǵy dostyq pen yntymaqtastyqtyń belgisi retinde A.Asqarov atyndaǵy dendrosaıabaqqa aǵash otyrǵyzdy.
Iran men Belarýs sý jáne energetıka salalaryndaǵy yntymaqtastyqty keńeıtedi — ParsToday
Iran men Belarýs sý resýrstaryn basqarý, elektr energııasy jáne energetıka salalaryndaǵy ekijaqty yntymaqtastyqty damytýǵa nıetti. Bul týraly Irannyń energetıka mınıstri Abbas Álıabadı Belarýske jasaǵan sapary barysynda málimdedi, dep jazdy ParsToday aqparat agenttigi.
Irannyń energetıka mınıstriniń aıtýynsha, Belarýs tarapymen ótken kelissózderde sý jáne elektr energetıkasy baǵyttaryndaǵy ózara is-qımyldyń jańa múmkindikteri qarastyrylǵan. Sondaı-aq eki el arasynda energııa óndirý men tutyný salasyndaǵy tájirıbe almasý máselesi talqylanǵan.
Abbas Álıabadı eki memlekettiń energetıka salasynda jınaqtaǵan tájirıbesi ózara tıimdi yntymaqtastyqqa jol ashatynyn atap ótti. Onyń sózinshe, Iran Belarýstiń energııa óndirý jáne tutyný baǵytyndaǵy tájirıbesin paıdalanýǵa, al óz kezeginde osy saladaǵy óz jetistikterimen bólisýge daıyn. Mınıstr sondaı-aq sý jáne elektr energetıkasy salalaryndaǵy áleýetti birlesip damytý úshin taraptar arasynda úılestirý jumystary júrgiziletinin jetkizdi. Kelissózderdiń naqty nátıjeleri aldaǵy ýaqytta belgili bolady dep kútilýde.
Qazaqstan men Tatarstandy baılanystyratyn jańa áýe baǵyty iske qosyldy — TRT
Qazaqstan men Tatarstan astanalary arasynda «Qazan — Astana — Qazan» baǵytyndaǵy turaqty áýe reısi iske qosyldy. Jańa baǵyttyń ashylý saltanaty Astana halyqaralyq áýejaıynda ótti.
Bul týraly osy aptada Túrkııa Radıo Televızııa portaly habarlady.
«TRT»-nyń deregine keltirgen súıensek, Qazaqstannyń Qazandaǵy Bas konsýly Erlan Ysqaqovtyń aıtýynsha, áýe qatynasynyń jolǵa qoıylýy týrızm, bıznes, mádenıet jáne sport salalaryndaǵy yntymaqtastyqty damytýǵa múmkindik beredi. Sondaı-aq Qazan qalasy arqyly Reseıdiń ózge óńirlerine tranzıtpen qatynaý jeńildeıdi.
Reısterdi Reseıdiń áýe kompanııasy Boeing 737 ushaqtarymen aptasyna eki ret — seısenbi jáne juma kúnderi oryndaıdy. Ushaqtyń Astanaǵa jergilikti ýaqyt boıynsha saǵat 05:15–te qonyp, keri baǵytta 06:30–da ushýy josparlanǵan. Eki qala arasyndaǵy baryp-qaıtý bıletiniń boljamdy quny 244 dollar (shamamen 110 myń teńge) bolady. Jańa baǵyt eki el arasyndaǵy kólik qatynasyn jandandyryp, týrıstik jáne saýda-ekonomıkalyq baılanystardy nyǵaıtýǵa baǵyttalǵan.
Sondaı-aq «TRT»-de «Erdoǵan Qazaqstannyń áýe keńistiginen ótip bara jatyp Toqaev pen halyqqa joldaý joldady» degen aqparatta jarııalanǵanyn aıta ketý kerek.
Túrkııa Radıo Televızııa portalynyń deregi boıynsha, Túrkııa Prezıdenti Rejep Taıyp Erdoǵan Ońtústik Koreıaǵa resmı sapary kezinde Qazaqstannyń áýe keńistiginen ótip bara jatyp, Memleket basshysy Qasym-Jomart Toqaevqa jáne Qazaqstan halqyna jyly lebizin bildirdi. Prezıdenttiń baspasóz hatshysy Aıbek Smadııarovtyń málimetinshe, Erdoǵan Qazaqstandy «tarıhı ata jurtymyz, dos ári baýyrlas el» dep atap, ekijaqty qarym-qatynastyń mańyzyn atap ótti. Sondaı-aq bıyl mamyrda Qazaqstanǵa jasaǵan sapary men Toqaevtyń Túrki memleketteri uıymynyń 13-sammıtine qatysý úshin Ankaraǵa barǵan saparyn jyly esteliktermen eske alyp, Prezıdentke zor densaýlyq, al Qazaqstan halqyna damý, órkendeý jáne amandyq tiledi.
Óz kezeginde Qasym-Jomart Toqaev áleýmettik jelidegi paraqshasynda Ankaraǵa sapary kezinde Qazaqstan delegatsııasyna kórsetken qonaqjaılylyǵy úshin túrik áriptesine alǵys aıtty. Memleket basshysy Qazaqstan men Túrkııa arasyndaǵy dostyq pen strategııalyq áriptestik baılanystary aldaǵy ýaqytta da nyǵaıyp, damı beretinine senim bildirdi.
Ál-Farabı murasy halyqaralyq sımpozıýmda talqylanýda — Eurasia Today
Ál-Farabı atyndaǵy Qazaq ulttyq ýnıversıtetinde 6 qarasha, juma kúni uly oıshyl Ábý Nasyr ál-Farabıdiń fılosofııalyq jáne ǵylymı murasyna arnalǵan «Fılosofııa. Іzgilik. Bolashaq» atty halyqaralyq sımpozıým bastaldy. Bul týraly osy aptada Qyrǵyzstanda shyǵatyn Eurasia Today aqparat agenttigi facebook-tegi paraqshasynda habarlady.
Atalǵan BAQ-tyń keltirgen derekterine súıensek, Іs-shara aıasynda QazUÝ men Islam áleminiń bilim, ǵylym jáne mádenıet uıymy (ISESKO) birlesip uıymdastyrǵan «Ál-Farabı jáne onyń adamzat tarıhyna qosqan úlesi» atty ІІ halyqaralyq konferentsııa ótýde. Jıynǵa Iran, Malaızııa, Qytaı, Túrkııa, Ózbekstan, Tájikstan, Týnıs jáne Reseıden belgili farabıtanýshylar, ǵalymdar, joǵary oqý oryndarynyń rektorlary, ǵylymı ortalyqtardyń jetekshileri men jas zertteýshiler qatysýda.
Sımpozıým barysynda Tegeran ýnıversıtetiniń professory, ǵylym doktory Reza Parsanıa Hamıd Mohamed «Shynaıy baqytty izdeý: Ál-Farabı etıkasy jáne qazirgi ýtılıtarızm» taqyrybynda baıandama jasady. Ol ál-Farabıdiń moraldyq-etıkalyq ilimin qazirgi batystyq ýtılıtarızm tujyrymdamasymen salystyra taldap, oıshyl dúnıetanymynda baqyttyń rýhanı kemeldený, parasattylyq jáne qoǵamǵa izgilik uıalatýmen tyǵyz baılanysty ekenin atap ótti. Sondaı-aq professor jahandyq daǵdarystar jaǵdaıynda ál-Farabıdiń «izgi qoǵam» jáne «qaıyrymdy qala» ıdeıalaryna qaıta nazar aýdarýdyń mańyzdylyǵyna toqtaldy.
