Ál-Farabı men Abaı mereıtoılaryna úlken mán berilýde- Saýytbek Abdrahmanov
«Óz Joldaýynda Memleket basshysynyń áleýmettik jańǵyrý, bilim berý sapasyn kóterý, ınnovatsııalyq tásilderdi qoldaný, sapaly medıtsınalyq qyzmet qoljetimdiligi máselelerin kóterýi qýantady. Jastarǵa da erekshe kóńil bólinip otyr. Barlyq aıtylǵan tapsyrmalardy júzege asyrý jastardyń azamattyq ustanymy men áleýmettik-saıası belsendiligine baılanysty», - dedi Saýytbek Abdrahmanov Dostyq úıinde Memleket basshysynyń Joldaýyn talqylaý jónindegi dóńgelek ústelde.
Depýtat memlekettik tildiń mártebesin kóterýdiń mańyzdylyǵy jóninde áńgimeledi.
«Prezıdent memlekettik tildiń mártebesi, qazaq tiliniń ultaralyq qatynas tili retindegi rólin nyǵaıtý máselesin kóterdi. Bul – birneshe jylǵa arnalǵan prespektıvalyq mindet. Oǵan tez jetemiz dep úmittený – bekershilik. Bálkim, bizdegi biraz adam ony kórmeýi múmkin, biraq keleshek urpaq týraly oılaýymyz kerek. Biz osyǵan kele jatyrmyz», - dedi ol.
Sonymen birge, S. Abdrahmanov ál-Farabı men Abaı mereıtoılaryn ótkizýge memlekettiń úlken mán berip otyrǵanyn aıtty.
«Prezıdent aıtqan ál-Farabıdiń 1150 jyldyǵy men Abaıdyń 175 jyldyq mereıtoıyn toılaý jóninde erekshe atap ótkim keledi. Men eki komıssııanyń da múshesimin, bul mereıtoılardy ótkizýge erekshe kóńil bólinip otyr. Jaqynda Memlekettik hatshy Marat Tájın komıssııa otyrysyn ótkizip, úlken tapsyrmalar berdi», - dedi Saýytbek Abdrahmanov.
