Ál-Farabı dańǵylynda 80 km/saǵ jyldamdyqqa ruqsat beretin belgiler ornatylýda
ALMATY. QazAqparat – Almatynyń ál-Farabı dańǵylynda saǵatyna 80 shaqyrym jyldamdyqpen júrýge ruqsat beretin belgiler paıda boldy, dep habarlaıdy QazAqparat tilshisi.
Ózgerister ál-Farabı dańǵylynyń keıbir ýchaskelerinde baıqalady. Jol qyzmetkerleri jyldamdyqty shekteý belgilerin 80 km/saǵ aýystyrýdy jalǵastyrýda.
Eske salaıyq, osy jyldyń 15 qańtarynan bastap qaladaǵy jol-kólik oqıǵalaryn azaıtý, sondaı-aq joldaǵy jaǵdaıdy turaqtandyrý maqsatynda kólik jyldamdyǵy Shyǵys aınalma joly, ál-Farabı dańǵyly, Saın kóshesinde saǵatyna 80 shaqyrymnan, 60 shaqyrymǵa tómendetilgen bolatyn. Ol kezde shaharǵa Baýyrjan Baıbek basshylyq etken edi.
Keıin qalanyń jańa ákimi Baqytjan Saǵyntaevtyń Instagram-paraqshasyna atalmysh jol ýchaskelerinde saǵatyna 80 shaqyrymmen júrýge qaıta ruqsat berý týraly ótinishter túse bastady.
Nátıjesinde, ıaǵnı 19 tamyz kúni ál-Farabı dańǵyly men Shyǵys aınalma jolynda saǵatyna 80 shaqyrymmen júrýge ruqsat berildi.
