Ál-Farabı dańǵylyndaǵy jol apaty boıynsha sotta jábirlenýshiler jaýap berdi
ALMATY. KAZINFORM — Almatyda Ál-Farabı dańǵylynda bolǵan jantúrshigerlik jol apatyna qatysty sot talqylaýy bastaldy.
Sot otyrysy Almaty qalasynyń qylmystyq ister jónindegi mamandandyrylǵan aýdanaralyq sotynda ótip jatyr. Tóraǵalyq etýshi sýdıa — Erkin Maıshynov, al aıyptalýshy — 32 jastaǵy kásipker.
Oǵan Qylmystyq kodekstiń 345-baby 4-bóligi boıynsha aıyp taǵylǵan. Sot otyrysy aralas formatta boldy. Aıyptalýshy men jábirlenýshiler otyrysqa onlaın rejımde qatysty.
Búgingi otyrysta jábirlenýshilerden jaýap alyndy. Jol apatynda qaza tapqan Mercedes avtokóligi júrgizýshisiniń ápkesi prokýror suraqtaryna jaýap berdi. Onyń sózinshe, tańǵy saǵat 7:00 shamasynda inisiniń mert bolǵany týraly habar kelgen jáne máıitti tanýǵa shaqyrylǵan. Ol inisiniń Ál-Farabı dańǵylyndaǵy jol apatynan kóz jumǵanyn sonda ǵana bilgen.
— Biz kúnde birge júretinbiz. Ol kompıýter klýbynda ákimshi bolyp jumys istedi, sonymen qatar meniń de sharýalaryma kómektesetin, — dedi ol.
Qaza tapqan júrgizýshiniń týystary sotqa aıyptalýshymen tatýlasqandary týraly ótinishhat berdi. Hatta aıyptalýshy kinásin tolyq moıyndap, shyn júrekten ókingeni, sondaı-aq materıaldyq jáne moraldyq shyǵyndy tolyǵymen ótegeni jazylǵan.
Olar bul sheshimdi eshqandaı qysymsyz, óz erkimen qabyldaǵanyn aıtty. Sonymen qatar marqumnyń týystary sottalýshyny tolyq keshirgenderin jáne eshqandaı talap-aryzdary joqtyǵyn alǵa tartyp, sottan oǵan bas bostandyǵynan aıyrýmen baılanysty emes jaza taǵaıyndaýdy surady.
Taǵy bir jábirlenýshi tarap — jol apatynan qaza tapqan 20 jastaǵy boıjetkenniń otbasyna sóz berildi. Sotta boıjetkenniń anasy jaýap berdi. Ol prokýrordyń suraqtaryna jaýap bere otyryp, qyzynyń taksıde jumys istegenin aıtty. Odan keıin boıjetkenniń týystary sottalýshymen tatýlasqany týraly ótinishhaty oqyldy. Áıeldiń aıtýynsha, olar qyzyn qaıtara almaıdy, sondyqtan otbasy aıyptalýshyǵa keshirim berýdi uıǵarǵan. Sottalýshy kinásin tolyq moıyndap, ókingeni, keshirim suraǵany jáne materıaldyq ári moraldyq shyǵyndy tolyq kólemde ótegeni atap ótildi. Tatýlasý týraly sheshim óz erkimen qabyldanǵan.
Marqumnyń týystary sottan aıyptalýshyǵa bas bostandyǵynan aıyrýmen baılanysty emes jaza taǵaıyndaýdy, sonyń ishinde shartty túrde sottaý múmkindigin qarastyrýdy surady.
— Biz ony tolyq keshirdik jáne oǵan eshqandaı talabymyz joǵyn rastaımyz. Bolashaqta da eshqandaı talap qoımaımyz, — delingen aryzda.
Úshinshi marqumnyń týystarynyń ustanymy sotta áli tyńdalǵan joq. Olardan jaýap alý kelesi otyrysqa shegerildi. Ol 4 maýsym kúni saǵat 10:00–de ótedi.
Eske salaıyq, ótken apta bul is boıynsha aldyn ala sot otyrysy ótti.
Buǵan deıin Almaty polıtsııa departamenti bul qylmystyq is boıynsha sotqa deıingi tergeýdiń aıaqtalǵanyn habarlaǵan edi.
Eske salaıyq, 2026 jylǵy 21 naýryzǵa qaraǵan túni Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.
Sondaı-aq Almaty qalasy polıtsııa departamentiniń bastyǵy Aıdyn Qabduldınov jol apatyna kóshe jarysynyń sebep bolǵany jáne oǵan polıtsııanyń joǵary laýazymdy tulǵasynyń qatysy týraly jelide taraǵan aqparattarǵa pikir bildirdi.
