Ál-Farabı dańǵylyndaǵy jol apaty boıynsha eks-polıtseıge sot úkimi shyqty
ALMATY. KAZINFORM — Medeý aýdanynyń qylmystyq ister jónindegi sotynda burynǵy polıtsııa qyzmetkerine sot úkimi shyǵaryldy.
Úsh adamnyń ómirin qıǵan jol apaty kezinde Almaty qalasy polıtsııa departamenti bastyǵynyń eks-orynbasary Erjan Uzabaevtyń júrgizýshi qyzmetin atqarǵan Áset Jaqsylyqovtyń isi sotta qaraldy.
Ol qaıǵyly oqıǵa bolǵan sátte Aleksandr Paktyń qasynda ekinshi kólikti basqarǵan. Sot úkimimen Jaqsylyqov QR Qylmystyq Kodeksiniń 370-baby (qyzmettegi áreketsizdik) boıynsha kináli dep tanyldy jáne 3,5 jylǵa bas bostandyǵynan aıyryldy. Úkim zańdy kúshine engen joq. Bul aqparatty Almaty sotynyń baspasóz qyzmeti rastady.
Eske salaıyq, 2026 jylǵy 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan.
Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty. Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.
Bul oqıǵa boıynsha sotta Áset Jaqsylyqovtan da jaýap alynǵan bolatyn.
Keıin 22 maýsymda sot Aleksandr Pakti QR Qylmystyq kodeksiniń 345-1-baby boıynsha kináli dep tanylyp, 10 jylǵa bas bostandyǵynan aıyryldy. Sondaı-aq sottalýshy Pak ómir boıyna júrgizýshi kýáliginen (kólik basqarý quqyǵynan) aıyryldy. Qaza tapqan qyzdyń ákesine tıesili talap aryz ishinara qanaǵattandyrylyp, 10 mıllıon teńge kóleminde ótemaqy belgilendi.
Tamyz aıynda Aleksandr Paktyń isi apellıatsııalyq sotta qaraldy.
