Ál-Farabı dańǵylynda bolǵan jol apaty kináli júrgizýshi tergeý ızolıatoryna qamaldy
ALMATY. KAZINFORM — Almatyda bolǵan jantúrgisherlik jol apatyna kináli júrgizýshi qamaýǵa alyndy.
Qalalyq polıtsııa departamentiniń málimetinshe, ZEEKR avtokóliginiń júrgizýshisi tergeý ızolıatoryna jetkizildi. Buǵan deıin kúdikti medıtsınalyq mekemede aıdaýylmen bolǵan.
— Ol qylmystyq is aıasynda ári qaraı kúzetpen ustaý úshin tergeý ızolıatoryna aýystyryldy, — dep habarlady departamentten.
Eske salaıyq, 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy. Bul bap boıynsha 10 jylǵa deıin bas bostandyǵynan aıyrý jazasy qarastyrylǵan.
Іshki ister mınıstri Erjan Sadenov Almatydaǵy jol apatynan keıin birqatar basshy qyzmetinen bosatylǵanyn málimdedi.
Sondaı-aq Almatyda «STOP buzýshylyq» aýqymdy operatsııasy bastalyp, 4 óńirdiń polıtsııa qyzmetkerleri keldi.
Megapolıs kóshelerinde túngi ýaqytta ýaqytsha polıtsııa beketteri jumys istep jatyr.
