Ál-Farabı atyndaǵy ýnıversıtette belgili jazýshy-jýrnalıst S. Ábdiraıymuly atyndaǵy oqý zaly ashyldy
ALMATY. Qyrkúıektiń 27-si. QazAqparat /Ádilet Musahaev/ - Qyrkúıektiń 25-de ál-Farabı atyndaǵy QazMÝ-diń jýrnalıstıka fakýltetinde mádenıet qaıratkeri,
daryndy jazýshy-jýrnalıst, aýdarmashy Serik Ábdiraıymuly atyndaǵy oqý zaly saltanatty túrde ashyldy.
Atalmysh sharany jýrnalıstıka fakýltetiniń dekany Ǵalııa Ibraeva quttyqtaý sózimen ashyp, osy kúnge deıin jýrnalıstıka fakýltetinde T. Amandosov, Q. Bekhojın, T. Qojakeev jáne M. Barmanqulovtardyń atyna aýdıtorııa berilgendigin aıtyp ótti. "Búgin qoǵam qaıratkeri, D.Qonaevtyń ómirin zertteýge úlken úles qosqan zertteýshi Serik Ábdiraıymuly atyndaǵy oqý zaly ashyldy. Osy oraıda bolashaq jastarda aǵa jolymen júrer degen nıetpen úzdik stýdentterimizge arnaıy shákirtaqy taǵaıyndalyp otyr jáne olar bizdiń senimimizdi aqtaıdy dep bilemiz», deıdi dekan.
Al Astanadan arnaıy kelgen Myrzataı Joldasbekov S. Ábdiraıymulynyń atqarǵan eren eńbekterine toqtalyp, parasatty adam bolǵandyǵyn jetkizdi. «Osyndaı oqý zalyn ashyp otyrǵan, basymyzdy ıip kiretuǵyn qarashańyraqqa alǵysym sheksiz. Serik, Aqseleý ekeýi egizdiń syńaryndaı edi. Árqaısysy saıdyń tasyndaı, arqardyń quljasyndaı azamat edi. «Ótti dáýren osylaı» atty D.Qonaev týraly kitaptyń dúnıege kelýi de S.Ábdiraıymulynyń jemisti eńbeginiń biri», deıdi M. Joldasbekov.
Jýrnalıstıka fakýltetiniń oqytýshysy Abdýl-Hamıt Marhabaev Serik Ábdiraıymuly sabaqqa keshikpeı, qaıta erte kelip, balalarmen aralasyp, aýdıtorııanyń kóńil kúıimen tanysatyndyǵyn aıtyp eske alady. "Qalamger qolyna qalam ustaǵannan keıin óz obektisin tańdap, sol obektisine jetýge talpynatyn. Sonymen qatar mádenıet pen ǵylymdaǵy jandar jóninde ádemi jazǵan adam edi», deıdi ol.
Serik Ábdiraıymuly «Sanat» baspasynyń basshysy bolǵan, ǵylymnyń 32 taraýy boıynsha 450-deı eńbekti jaryqqa shyǵarǵan. Sondaı-aq atalmysh ýnıversıtette 36 jyl sabaq bergen.
50 myń teńge kólemindegi S.Ábdiraıymuly atyndaǵy shákirtaqy «Baspa isi jáne BAQ dızaıny» mamandyǵynyń 1-kýrs magıstranty Áıgerim Dáýirbaevaǵa tapsyrylsa, 3-kýrs stýdenti Oljas Baıjanǵa, 4-kýrs stýdenti Shapaǵat Qarataevaǵa jáne jýrnalıstıka mamandyǵynyń 4-kýrs stýdenti Mıras Nııatovqa 30 myń teńge kólemindegi shákirtaqy tapsyryldy.
Saltanatty sharaǵa qoǵam qaıratkerleri, ǵalymdar men jazýshylar, QR Prezıdenttik mádenıet ortalyǵynyń dırektory Myrzataı Joldasbekov, L.N.Gýmılev atyndaǵy Eýrazııa Ulttyq ýnıversıtetiniń rektory Baqytjan Ábdiraıymov, Aqtóbe oblysy ákiminiń orynbasary Qalıjan Ábdiraıymov, jazýshy Beksultan Nurjekeuly syndy tanymal adamdar keldi.
