Ál-Farabı atyndaǵy memlekettik syılyǵynyń laýreattaryn marapattaý Táýelsizdik kúni qarsańynda ótkiziledi
Gúlshara Ábdiqalyqova uzaqmerzimdi «Qazaqstan-2050» strategııasy men Bes ınstıtýtsıonaldyq reformany odan ári iske asyrý isinde ekonomıkalyq ósý men adamı kapıtaldyń damýyn qamtamasyz etetin eldiń mańyzdy strategııalyq resýrsy retinde ǵylymnyń róli erekshe ekenin atap ótti.
- Bul reformalar bilimge negizdelgen ulttyq ekonomıkany qalyptastyrýǵa baǵyttalǵan. Sondyqtan ǵylymı qyzmettiń bedelin arttyrý, sondaı-aq ǵalymdardy úzdik ǵylymı zertteýlerge yntalandyrý, ınnovatsııalardy engizý maqsatynda Qazaqstan Respýblıkasy Prezıdentiniń tapsyrmasy boıynsha Qazaqstan Respýblıkasynyń Ǵylym men tehnıka salasyndaǵy ál-Farabı atyndaǵy memlekettik syılyǵy taǵaıyndaldy, - dedi Memlekettik hatshy.
Syılyqqa úmitker retinde ekonomıkanyń túrli salalarynda jańa ónim men tehnologııalardy jasap shyǵarý jóninen moıyndalǵan ǵylymı-tehnıkalyq, tehnologııalyq jáne ınnovatsııalyq qyzmet nátıjeleri usynyldy.
3 maýsymda komıssııanyń alǵashqy otyrysy ótip, onda 26 jumys qaraldy, sonyń 9-y odan ári konkýrsqa qatysý úshin usynyldy.
Aldyn ala irikteýden ótken jumystardyń tizbesi «Egemen Qazaqstan» jáne «Kazahstanskaıa pravda» gazetterinde jarııalandy. Eki aı ishinde olardy kópshilikpen talqylaý jónindegi is-sharalar júrgizildi.
Otyrys qorytyndysy boıynsha Komıssııa Elbasyǵa usynylatyn úmitkerlerdi anyqtady.
Qazaqstan Respýblıkasynyń Ǵylym men tehnıka salasyndaǵy ál-Farabı atyndaǵy memlekettik syılyǵynyń laýreattaryn marapattaý Táýelsizdik kúni qarsańynda ótkiziledi.
