Ál-Farabı atyndaǵy QazUÝ Web of Science Awards marapatyn ıelendi

ASTANA. QazAqparat - Elimizdiń jetekshi ýnıversıteti ál-Farabı atyndaǵy QazUÝ sońǵy 5 jylda «Web of Science» halyqaralyq derekqorynda ındeksteletin nóldik ımpakt-faktordan joǵary reıtıngilik jýrnaldarda jarııalanǵan maqalalar sany boıynsha Qazaqstannyń ǵylymı-zertteý uıymdary men joǵary oqý oryndarynyń arasynda birinshi oryndy ıelendi. Bul týraly oqý ornynyń baspasóz qyzmetine silteme jasap QazAqparat habarlaıdy.

«Clarivate Analytics» halyqaralyq kompanııasy «Ǵylym kóshbasshysy - Web of Science Awards» táýelsiz marapatynyń saltanatty rásimin ótkizdi, onda Qazaqstannyń ǵylymı basylymdary men ǵylymı uıymdarynyń avtorlary ǵylymnyń damýyna qosqan úlesi úshin atap ótildi.

Ál-Farabı atyndaǵy QazUÝ eldegi joǵary oqý oryndary men ǵylymı uıymdar arasynda «Web of Science Core Collection basylymdaryndaǵy kóshbasshy» nomınatsııasynda táýelsiz marapatqa ıe boldy.

Bul marapat taǵy da QazUÝ-dyń jetekshi ýnıversıtet retinde ǵylym, bilim jáne ınnovatsııanyń aldyńǵy qatarly ortalyǵy ekendigin, sondaı-aq halyqaralyq reıtıngtik jýrnaldarda ǵalymdardyń ǵylymı-zertteý jumystarynyń joǵary deńgeıin kórsetti. QazUÝ ǵalymdarynan dáıeksóz keltirilgen basylymdar sany jyl saıyn 40%-ǵa ósýde. Bul QazUÝ-dy álemdik deńgeıdegi zertteý ýnıversıtetine aınaldyrý, ǵalamdyq ǵylymı jáne bilim berý keńistigine ınternatsıonaldandyrý jáne ıntegratsııa saıasatyn júzege asyrý boıynsha júıeli jumystyń nátıjesi.

«Web of Science Core Collection» - álemdegi ǵylymı basylymdardyń jetekshi derekqory. Onda 18 myńnan astam jýrnal ındeksteledi, olardyń 12 myńnan astamynyń ımpakt-faktory bar.