Ál-Farabı atyndaǵy QazUÝ rektory Italııanyń memlekettik ordenimen marapattaldy
ALMATY. QazAqparat - Italııa Respýblıkasynyń Prezıdenti Serdjo Mattarellanyń jarlyǵymen ál-Farabı atyndaǵy Qazaq ulttyq ýnıversıtetiniń rektory Ǵalym Mutanov «Ordine al merito della Repubblica Italiana» ordenimen marapattaldy, dep habarlaıdy QazAqparat.
Almatyda Italııa Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Paskýale D'Avıno atalmysh el prezıdenti atynan QazUÝ rektory akademık Ǵalym Mutanovqa eń joǵary memlekettik nagrada - «Italııa Respýblıkasyna sińirgen zor eńbegi úshin» ordenin tabys etti.
Orden 1951 jyly taǵaıyndalǵan jáne Italııa aldyndaǵy mańyzdy eńbegi úshin premer-mınıstrmen kelise otyryp el prezıdenti tarapynan uıǵarylady. Ýnıversıtettiń Ǵylymı keńesinde ordendi tabystaǵan Elshi Paskýale D'Avıno QazUÝ rektoryn halyqaralyq qoǵamdastyqtaǵy kórnekti ǵalym, joǵary mektep jasampazy jáne uıymdastyrýshysy dep atady. Onyń basshylyǵymen Qazaqstannyń jetekshi ýnıversıteti álemde joǵary bedelge ıe bolǵanyn jáne birneshe iri ǵylymı-bilim berý jobalary júzege asqanyn atap ótti.
«Akademık Ǵalym Mutanovtyń Qazaqstan men Italııa arasyndaǵy ǵylym jáne bilim salalaryndaǵy áriptestigin damytýǵa, sondaı-aq eki eldiń dostyq qarym-qatynastaryn nyǵaıtýǵa qosqan zor úlesi joǵary memlekettik marapatpen baǵalandy. Búgin osy ordendi tabystaý men úshin qýanysh», - dep atap ótti Elshi.
Ál-Farabı atyndaǵy QazUÝ Italııanyń jetekshi joǵary oqý oryndarymen tyǵyz áriptestik qarym-qatynas ornatqan. Ýnıversıtette Romandyq zertteýler ortalyǵy qurylyp, sátti jumys atqarýda, al Ka Foskarı ýnıversıtetinde ál-Farabı ortalyǵy ashylyp, halyqaralyq bilim berý baǵdarlamalary aıasynda akademııalyq almasý jáne mamandardy daıyndaý belsendi júrgizilýde.
