Ál-Farabı atyndaǵy QazUÝ «Qaıyrymdy qoǵam» chellendjin bastady

ALMATY. QazAqparat - Ál-Farabı atyndaǵy Qazaq ulttyq ýnıversıtetiniń stýdentteri «Qaıyrymdy qoǵam» chellendjin bastap, úlken flesh-mob ótkizdi. Chellendj maqsaty - ál-Farabı aıtqandaı, qoǵamdy qaıyrymdy etý, dep habarlaıdy QazAqparat JOO-nyń baspasóz qyzmetine silteme jasap.

«1150 jyldyǵyn ıÝNESKO deńgeıinde búkil álem toılap jatqan uly oıshyl ál-Farabıdiń ýnıversıtet kampýsyndaǵy eskertkishiniń aldyna ár fakýltetten 5 myńnan astam stýdent jınaldy. Bul teńdesi joq joba ǵulama ál-Farabıdiń adamzat úshin eń basty dep sanalǵan qundylyqtary: meıirimdilik, parasattylyq, adaldyq jáne ádildik týraly eske salý úshin eldegi ıgi ister estafetasyn basty. Chellendjge kez kelgen adam qatysa alady. Ol úshin áleýmettik jelilerde qaıyrymdy is-áreketter, qaıyrymdy jáne izgi ister týraly post, fotosýretter nemese vıdeorolık jarııalaý jetkilikti. Chellendjdiń uıymdastyrýshylary estafetany jalǵastyrýdy jáne ony #AlFarabiQQ heshtegimen súıemeldeýdi usynady», - dedi JOO-dan.

«Uly ál-Farabı «Baqyttyń máni – parasattylyqta, árkimniń óz aldynda ıgilikti maqsat qoıa bilýinde... adamnyń óz minez-qulqyn, is-áreketin erikti túrde ózgertip, ıgilikke baǵyttap otyrýynda», - degen bolatyn. Árbir adamnyń jaqsylyq jasaýǵa, ózin jáne aınalasyndaǵylardy baqytty etýge bar kúsh-jigeri jetedi. Eger biz árqaısymyz óz-ózimizdi jetildirýge jáne jaqsy is-áreketter jasaýǵa umtylsaq, barshamyz birge Qazaqstandy qýatty ult pen jaýapty adamdardan turatyn - tabysty, qaıyrymdy elge aınaldyramyz», - deıdi flesh-mobqa qatysqan ekinshi kýrs stýdenti Hasan Nursat.

Joba jastar arasynda volonterlik qozǵalysty damytýǵa, áleýmettik yntymaqtastyqty nyǵaıtýǵa jáne tek jahandyq qana emes, sonymen qatar jergilikti qoǵamdastyq máselelerin de sheshý boıynsha bastamashylyq toptardy uıymdastyrýǵa, naqty adamdarǵa kómek kórsetýge baǵyttalǵan. QazUÝ stýdentteri chellendjdi iske asyrýǵa kirisip te ketti, qaıyrymdy ister atqara otyryp olar estafetany elimizdegi, alys jáne jaqyn shetelderdegi túrli JOO-larǵa joldaıdy.

Bastaýshy toptyń paıymdaýynsha, bul chellendjge qatysý medıakeńistikti oń mazmunmen tolyqtyrady jáne bir-birine meıirimdilik pen janashyrlyq tanyta otyryp, qıyn qystaý jaǵdaıǵa tap bolǵan adamdardyń ómirine beı-jaı qaramaı, bir-birine kómektesý arqyly, naqty is-áreketter jasaýdyń mańyzdy ekenin eske salýǵa múmkindik beredi.