Ál-Farabı atyndaǵy QazUÝ-dyń resmı aqparaty

ALMATY. QazAqparat - Áleýmettik jelilerde jáne birqatar buqaralyq aqparat quraldarynda QazUÝ basshylyǵy tarapynan ýnıversıtettiń jer ýchaskeleri jeke tulǵaǵa satylǵandyǵy jóninde aqparat jarııalandy. Buǵan deıin ýnıversıtet osy másele boıynsha jurtshylyqqa óz ustanymyn usyndy jáne qandaı da bir zańsyz áreketke qatysy joq ekendigin resmı túrde joqqa shyǵardy.

Úlken qoǵamdyq rezonansty eskere otyryp, bul jaǵdaı ýnıversıtettiń Ǵylymı keńesiniń keńeıtilgen otyrysynda qaraldy, onda QazUÝ men onyń basshylyǵynyń bedelin túsiretin negizsiz aıyptaýlarǵa jol bermeý týraly biryńǵaı ortaq pikir aıtyldy.

Sonymen qatar bul másele ál-Farabı atyndaǵy QazUÝ Dırektorlar keńesiniń alǵashqy otyrysynda qaraldy.

Atap ótý qajet, áleýmettik jelilerdegi jarııalanymdardyń avtorlary M.Kozachkov pen B.Bazarbek usynǵan qujattardyń kóshirmelerin tekserý barysynda anyqtalǵandaı, jobany ázirleýshi retinde «Geo Audit Company» JShS kórsetilgen 8.08.2017 j. jerge ornalastyrý jobasynyń tıtýldyq paraǵynda ýnıversıtet atynan qoıylǵan qoldar jalǵan, onda qol qoıýshynyń laýazymy men aty-jóni kórsetilmegen, sondaı-aq ál-Farabı atyndaǵy QazUÝ-dyń eltańbaly móri joq.

«Geo Audit Company» JShS dırektory O.Bazarbaıdyń atyna jerge ornalastyrý jobasyn ázirleýge 8.08.2017 jylǵy ótinish pen Almaty qalasy jer qatynastary basqarmasynyń basshysy A.J.Ahmetovtyń ákimdik qaýlysynyń jobasyn daıyndaý úshin jerge ornalastyrý jobasyn bekitý týraly 16.08.2017 jylǵy ótinishinde de dál osyndaı jaǵdaı anyqtaldy.

Ýnıversıtet pen onyń laýazymdy tulǵalary jer ýchaskelerin ıelikten shyǵarýǵa qatysty eshqandaı ótinishter men qujattar joldamaǵanyn jáne qol qoımaǵanyn resmı túrde málimdeımiz.

Sonymen qatar 2017 jyly QazUÝ 3.08.2017 j. Almaty qalasy jer ýchaskelerin berý jónindegi komıssııa otyrysynyń №28 hattamasynda kórsetilgendeı kommýnaldyq memlekettik mekeme emes, sharýashylyq júrgizý quqyǵyndaǵy respýblıkalyq memlekettik kásiporyn boldy, sondyqtan QR qoldanystaǵy zańnamasyna sáıkes bul máseleni komıssııanyń qaraýyna shyǵarýǵa múldem quqyqtyq negiz bolmaǵan.

Buǵan qosa ýnıversıtetke qatysty jalǵasyp kele jatqan aqparattyq shabýylda joǵaryda atalǵan avtorlar QazUÝ-dyń birinshi prorektory M.Búrkitbaevtyń qoly qoıylǵan 1.08.2017 j. №9-9-2362 hatty ýnıversıtettiń ózi tarapynan jer ýchaskesin ıelikten shyǵarýyna negiz retinde usynýǵa tyrysýda.

Bul ýnıversıtet basshylyǵyn ózi jasamaǵan áreketteri úshin aıyptaýdyń taǵy bir dáıeksiz ári «qısynsyz qurastyrylǵan» jalǵan talpynysy.

Osy rette, joǵaryda atalǵan hat 2017 jyldyń jazynda oryn alǵan oqıǵalar konteksinde jazylǵanyn resmı túrde habarlaımyz. 2017 jyldyń aqpan aıynda Almaty qalasynyń ákimdigi «Qorshaýsyz qala» baǵdarlamasyn qolǵa alǵany belgili.

2017 jylǵy 6 maýsymda QazUÝ-dyń atyna Almaty qalasy Jerdiń paıdalanylýy men qorǵalýyn baqylaý basqarmasy nyń jer zańnamasynyń saqtalýyna jospardan tys tekserý júrgizý týraly habarlamasy kelip tústi, al 12 maýsymda tekserý taǵaıyndaý týraly akt alyndy.

Tekserý barysynda ál-Farabı atyndaǵy QazUÝ-dyń naqty ıelenip otyrǵan aýmaǵy sáıkestendirý qujatynda kórsetilgen shekaralarǵa sáıkes kelmeıtindigi anyqtaldy.

Jerdiń paıdalanýy men qorǵalýyn memlekettik baqylaý bóliminiń memlekettik ınspektory A.Bolǵanbaevtyń qoly qoıylǵan 14.06.2017 j. tekserý nátıjeleri týraly akti men 14.06.2017 j. №198 hattamada QazUÝ ıelengen aýmaq 0,7 ga kóleminde asyp ketkendigi týraly aıtyldy.

Sonymen birge buǵan qosymsha retinde buzýshylyqty 2017 jyldyń 19 shildesine deıin joıý qajettigi týraly №370 uıǵarym shyǵaryldy.

Birinshi prorektor M.Búrkitbaevtyń qoly qoıylǵan 1.08.2017 jylǵy hat osy joǵaryda kórsetilgen tekserýge jáne uıǵarymdy oryndaý qajettiligine baılanysty jazylǵan, sol sebepten onda ál-Farabı atyndaǵy QazUÝ-dyń jer ýchaskesiniń shekarasyn túzetý týraly ótinish kórsetilgen.

Joǵaryda atalǵan faktilerge baılanysty bul hattyń mazmunynda budan ózge pıǵyl, onyń ishinde ýnıversıtettiń jer ýchaskesin satý, bólý nemese ıelikten shyǵarý kózdelgen emes ári mundaı pıǵyl múldem bolǵan emes.

Taǵy da resmı túrde málimdeımiz, ál-Farabı atyndaǵy QazUÝ ókilderi 2017 jyly jer ýchaskelerin ıelikten shyǵarý boıynsha qandaı da bir qujattardy ázirleýge qatysqan joq.

Joǵaryda baıandalǵannyń negizinde, Almaty qalasynyń prokýratýrasyna jáne polıtsııa departamentine buǵan deıin jiberilgen ótinishterge qosymsha, ýnıversıtet 2021 jylǵy 8 qańtarda polıtsııa departamentine «Geo Audit Company» JShS dırektory O.Bazarbaı men basqa da anyqtalmaǵan tulǵalarǵa qatysty alaıaqtyq jáne ózge de quqyqqa qarsy áreketteri úshin tıisti protsestik áreketterdi qabyldaý týraly ótinish berdi.

Bul másele óz sheshimin quqyqtyq aıada tabýy tıis dep bilemiz.