Ál-Farabı atyndaǵy QazUÝ-dyń halyqaralyq qatynastar fakýltetine 15 jyl toldy
ALMATY. 1 qarasha. QazAqparat /Ádilet Musahaev/ - Aǵymdaǵy jyldyń 29 qazanynda Ál-Farabı atyndaǵy QazUÝ-da halyqaralyq qatynastar fakýltetiniń 15 jyldyǵyna arnalǵan merekelik kesh ótti.
Mereıtoıǵa QR SІM, QR Bilim jáne ǵylym mınıstrligi ókilderi, AQSh, Germanııa, Frantsııa, QHR, Japonııa jáne basqa da memleket elshilikteriniń ókilderi qatyssa, álemniń AQSh, Eýropa jáne Orta Azııa elderinen birshama quttyqtaý hattar kelipti.
Elimizdiń syrtqy-ishki saıasatyna jetekshi mamandar daıarlap otyrǵan fakýltet ustazdarynyń eńbegi ólsheýsiz ekeni belgili. Osy oraıda ýnıversıtet basshylyǵy ustazdardy 15 jyldyq merekelerimen quttyqtap, izgi nıetin bildirdi. "15 jyl ishinde halyqaralyq qatynastar fakýlteti 2500-den astam túlekti qanattandyryp úlgerdi. Bul fakýltetten daıarlanǵan joǵary qabiletti mamandar eldi dúnıe júzine tanytyp júr. Aldaǵy eńbekterińizge de tabys tileımin", - dep atap ótti QazUÝ rektory, akademık Ǵalymqaıyr Mutanov.
Jıyn barysynda bilikti maman daıyndaýǵa qosqan úlesi úshin fakýltettiń birqatar oqytýshylary rektordyń «Alǵys hatymen» marapattaldy.
Halyqaralyq qatynastar fakýlteti 1995 jyly Qazaqstan Respýblıkasy Syrtqy ister mınıstrliginiń ótinishi negizinde qurylǵan. Fakýltet halyqaralyq qatynas, halyqaralyq quqyq, aımaqtaný, álemdik ekonomıka salalary boıynsha joǵarǵy bilikti jáne básekege qabiletti mamandar daıyndaıdy.
Keshke arnaıy kelgen elimizdiń dıplomattary Aqmaral Arystanbekova, Qaırat Isagalıev jáne taǵy basqalar stýdenttermen pikirlesip, óz tájirıbelerimen bólisti.
AQSh-tyń Almatydaǵy Bas konsýly Maıkl Snoýden atalmysh fakýltet ókilderimen tyǵyz baılanysta ekendigin jetkizdi «Halyqaralyq qatynastar fakýlteti táýelsiz Qazaqstannyń syrtqy saıasatyna mamandar daıyndaýdyń atrıbýty boldy. Aldaǵy ýaqytta mamandar daıarlaý barysynda halyqaralyq jańa jobalar tileımin», deıdi Bas konsýl.
