Ál-Farabı atyndaǵy QazUÝ-diń hımııa jáne hımııalyq tehnologııa fakýlteti jańǵyrý kezeńinde - professor Muqambetqalı Búrkitbaev
ALMATY. 9 jeltoqsan. QazAqparat /Erlik Erjanuly/ - QR UǴA korrespondent-múshesi, professor Batyrbek Ahmetuly Birimjanovtyń hımııa ǵylymyn damytýdaǵy úlesi óte zor.
Bul búgin Almatyda ótip jatqan «Hımııa jáne hımııalyq tehnologııa» boıynsha VII Halyqaralyq Birimjanov sezinde aıtyldy.
Ál-Farabı atyndaǵy Qazaq ulttyq ýnıversıtetiniń 1-prorektory Muqambetqalı Búrkitbaevtyń aıtýynsha, joǵary oqý ornynyń hımııa fakýltetiniń damý tarıhyn negizgi úsh kezeńge bólýge bolady. Birinshi kezeń - fakýltettiń qalyptasý kezeńi. Ol 1934-1954 jyldardy qamtıdy. Bul kezde alǵashqy dekanymyz akademık Ábiken Bekturovtan bastap, keıin sol kisiniń shaqyrýymen fakýltette eńbek etken akademıkter M.Ýsanovıch, D.Sokolskıı, M.Kozlovskıı, O.Songına sııaqty ǵulama ǵalymdar fakýltettiń irgetasyn qalap, negizin qalyptastyrdy. Ekinshi kezeń - fakýltettiń damý kezeńi. Bul B.Birimjanov jetekshilik jasaǵan 1954 jyldan 1980 jylǵa deıingi 25 jyldan asa ýaqytty qamtıdy. Ony fakýltettiń sharyqtaý nemese órkendeý kezeńi dep aıtsaq ta bolady.
«Osy jyldary fakýltette jańa 6 kafedra ashyldy, elimizde aty atalǵan akademıkter negizin qalaǵan ǵylymı mektepter men baǵyttar qalyptasty. Qazir fakýltette qaıta túrlený nemese jańǵyrý kezeńi júrip jatyr. Ol 1980 jyly bastalǵan bolatyn. Bul kezeńde fakýltettiń ǵylymı-zertteý ınstıtýttary quryldy. Bilim berýdiń kópsatyly júıesi jasaldy, birneshe jańa mamandyqtar ashyldy, fakýltet jańa ǵımaratqa kóship naryqtyq ekonomıka talaptaryna saı fakýltet jumysy qaıta jańǵyrýda», - deıdi professor M. Búrkitbaev.
