Ál-Farabı atyndaǵy QazUÝ-de jemqorlyqpen kúres jumystary nyǵaıtylýda
ALMATY. QazAqparat - Ál-Farabı atyndaǵy Qazaq ulttyq ýnıversıteti belsendi túrde «100 naqty qadam» Ult josparyn belsendi júzege asyrýda. Elimizdegi aldyńǵy qatarly oqý ornynyń negizgi damý vektory týraly Ál-Farabı atyndaǵy QazUÝ qyzmetkerleriniń «Parasat» kásipodaq uıymynyń tóraǵasy Talǵat Mekebaev aıtty.
Onyń sózinshe, «Memleketti kásibılendirý» birinshi reformasyna saı QazUÝ-da nátıjege baǵdarlanǵan basqarma engizilgen.
Qazirgi tańda ýnıversıtette jumysty baǵalaýdyń reıtıngtik júıesi qolǵa alynǵan. Korporatıvtik mádenıet boıynsha mańyzdy qujattar qabyldanǵan. Olar: «Muǵalimder men qyzmetkerlerdiń mádenı korporatıvtk kodeksi», «Stýdentterdiń adaldyq kodeksi», «Jemqorlyqsyz ýnıversıtet» sııaqty qujattar.
«Jemqorlyqsyz ýnıversıtet» jobasy «Jemqorlyqqa qarsy kúresti kúsheıtý» atty 13-qadamdy júzege asyrý aıasynda qolǵa alynǵanyn aıta ketý kerek. Atalmysh joba aıasynda basqarý qyzmetindegi jemqorlyqqa qarsy mehanızm jolǵa qoıylyp, oqý úderisindegi sybaılas jemqorlyqqa qarsy tehnologııalar engizilgen.
Ýnıversıtette «Zańnyń ústemdigin qamtamasyz etý» atty ekinshi reforma aıasynda jastardy belsendi azamattyq ustanymmen tárbıeleıtin Pedagogıkalyq tálimger ınstıtýty jumys isteýde.
Úshinshi reforma - «Indýstrııalandyrý jáne ekonomıkalyq ósim» jobasyn júzege asyrý maqsatynda ýnıversıtettiń professorlyq-oqytýshylyq quramy bilim berý men ǵylym júıesin jańartý máselesin talqylaýda.
QazUÝ-da «Birtektilik pen birlik» atty tórtinshi reforma aıasynda ınnovatsııalyq áleýmettik jobalar júzege asyrylýda. Olar: Al-Farabi university smart city, «Aınalańdy nurlandyr!», «Men jastarǵa senemin!» jas stýdentterdiń patrıottyq festıvali, «100 kitap» jáne taǵy basqalar bar.
QazUÝ ujymy «Esep beretin memleketti qalyptastyrý» degen besinshi reforma aıasynda basqarýdaǵy ashyqtyqty damytý, ıaǵnı áleýmettik yntymaqtastyq negizinde oqý ornyn basqarýda qoǵamdyq jáne kásibı birlestikterge qatysýdy keńeıtý máselesin sheshýde.
«Atalǵan jumystardyń barlyǵy QazUÝ-dyń básekege qabilettiligin joǵarylatýǵa, bizdiń ýnıversıtette álemdik bilim jáne ǵylym talaptaryn damytýǵa baǵyttalǵan», - dep atap ótti professor.
Aıta keteıik, Ál-Farabı atyndaǵy QazUÝ - Qazaqstandaǵy aldyńǵy ári kóp salaly joǵary oqý orny. Bilim oshaǵy Almaty qalasynda ornalasqan. Ýnıversıtet kesheni 90 gektardy alyp jatyr.
