Ál-Farabı atyndaǵy QazUÝ-de alǵash ret «Baspa kúni» merekesi ótti
ALMATY. Qarashanyń 25-i. QazAqparat /Názıra Eleýhan/ - Búgin Almatyda Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetinde Baspa isi jáne redaktsııalaý kafedrasynyń uıymdastyrýymen alǵash ret «Baspa kúni» merekesi ótti,
dep habarlaıdy QazAqparat.
Atalmysh sharanyń maqsaty - oqý orny men óndiris oryndarynyń baılanysyn nyǵaıtý, oqý úrdisindegi teorııalyq-tanymdy tájirıbeni ushtastyrýdy jańa sapaǵa kóterý, baspager-ustaz jáne stýdent-shákirt ınstıtýtyn qalyptastyrý.
«Tuńǵysh ret uıymdastyrylyp otyrǵan bul sharany apta saıyn ár baspa ótkizip turatyn bolady. Bul shara jylda bolatyn dástúrge aınalmaq. Osyndaı sharalar arqyly jastardyń búgingi tańdaǵy baspa isine degen kózqarasyn zaman talabyna saı baǵyttaý, bolashaq baspager-redaktorlardy daıarlaý isin jaqsartý bolyp tabylady», deıdi Baspa isi jáne redaktsııalaý kafedrasynyń meńgerýshisi, fılologııa ǵylymdarynyń kandıdaty, ónertanýshy Saǵatbek Medeýbek.
Merekede «Mektep» baspasy ónimderiniń kórmesi uıymdastyryldy.
«Mektep» baspasynyń redaktorlary stýdentterge arnap, tehnıkalyq redaktor, ádebı redaktor, bezendirýshi mamandyqtary boıynsha sheberlik saǵattaryn ótkizdi. Shara barysynda baspa men fakýltet arasyndaǵy ózara kelisim jónindegi memorandýmǵa qol qoıdy. Sonymen qatar, baspager-ustaz ben stýdent-shákirt arasyndaǵy ózara senimhatqa qol qoıyldy.
