Ál-Farabı atyndaǵy QazUÝ-da jańa oqý jylynda bakalavrıatta - 3, magıstratýrada - 4, PhD doktorantýrada - 2 jańa mamandyq ashyldy
ALMATY. 1 qyrkúıek. QazAqparat - Almatydaǵy Ál-Farabı atyndaǵy Qazaq ulttyq ýnıversıteti bilim grantynyń sany boıynsha joǵary oqý oryndary arasynda respýblıka boıynsha kóshbasshy bolyp otyr.
Bıyl onda memlekettik tapsyrys boıynsha mamandardy daıarlaýǵa bakalavrıat baǵdarlamasy boıynsha 2700-ge, magıstratýraǵa 1000-ǵa jýyq, al PhD doktorantýrasy úshin 120 grant bólindi. Oqý orny «Altyn belgi» ıegerleri, halyqaralyq, respýblıkalyq olımpıadalardyń jáne ǵylymı jobalardyń jeńimpazdary sııaqty basym quqyq ıegerlerin qabyldaý jóninen de respýblıka boıynsha jetekshi ýnıversıtetterdiń aldynda keledi.
«Bıyl bakalavrıat baǵdarlamasy boıynsha - kitaphana isi, elektr energetıkasy jáne jylý energetıkasy boıynsha - 3, magıstratýrada álemdik ekonomıka, ǵarysh tehnıkasy jáne tehnologııalary, jylý energetıkasy jáne nanomaterıaldar, nanotehnologııalar boıynsha - 4, al doktorantýrada túrkitaný men esep jáne aýdıt degen 2 mamandyq ashyldy. Magıstratýra men doktorantýraǵa túsý kezinde jekelegen mamandyqtarǵa báseke óte joǵary boldy. Máselen, keıbir mamandyqtarǵa bir grantqa 20-30 adamnan keldi», - deıdi ýnıversıtettiń baspasóz qyzmetiniń mamany Eńlik Aqjigit. Onyń aıtýynsha, QazUÝ-da aqyly bólimine qabyldanýdyń eń tómengi ótý deńgeıi bıyl da byltyrǵy jyldaǵydaı 70 upaıdy qurady.
Aqyly negizde bilim alǵysy keletin stýdentter men magıstranttardyń tólem aqysyna arnaıy jeńildik pen shegerimniń keńeıtilgen tıimdi júıesi qoldanyldy. Máselen, mektepti erekshe attestatqa bitirgen talapkerler aqyly bólimge túskisi kelgen jaǵdaıda oqýdyń birinshi jylyna 15 paıyzdyq jeńildikke ıe bolsa, joǵary oqý ornyn «óte jaqsy» degen baǵaǵa tamamdaǵan jáne magıstratýraǵa túsetin talapkerlerge 20 paıyzdyq shegerim qarastyrylǵan. Sondaı-aq, aýyldyq mektepterdi «jaqsy» jáne «óte jaqsy» degen baǵaǵa tamamdaǵan bitirýshilerge 10 paıyzdyq jeńildik qarastyryldy. Al magıstratýranyń aqyly bólimine qujat tapsyrǵan talapkerge oqý aqysyn birden tolyq tólegen jaǵdaıda, 10 paıyzdyq jeńildik jasalady.
