Ál-Farabı atyndaǵy QazUÝ-da stýdenttik ınternet-portaly iske qosyldy
ALMATY. Sáýirdiń 14-i. QazAqparat / Ádilet Musahaev / - Stýdenttik ómir týraly barlyq aqparattar qamtylǵan atalmysh joba elimizdegi joǵary oqý oryndaryndaǵy 20 myń stýdentiniń basyn qosyp otyr,
dep habarlaıdy QazAqparat.
Portalda ýnıversıtet ishinde nemese odan tys bolyp jatqan oqıǵalar, túrli merekelik sharalar, mańyzdy taqyryptarda ótken dóńgelek ústelder men pikirsaıystar jáne taǵy basqa málimetter jınaqtalǵan.
«QazUÝ-dyń 75 jyldyq mereıtoıy qarsańynda ýnıversıtet rektory bastamasymen 300 kompıýterlik Jastar ınternet ortalyǵy ashylǵan bolatyn. Búgin mine sol ortalyqta jastarymyzǵa arnalyp «Stýdenttik ómir» atty portal ashyldy», deıdi QazUÝ-dyń Damý jáne quqyqtyq máseleler jónindegi prorektory Nurlan Ybyraıym.
Sonymen qatar ol QazUÝ-dyń stýdenti saıtta 25 Gb kóleminde óziniń Live&Edu atty jeke poshtasyn asha alatyndyǵyn jetkizdi. «Bul qural ýnıversıtet stýdentterine alys jáne jaqyn elderdegi dostarymen, ǵylymı áriptesterimen online júıesi negizinde sóılesýge múmkindik beredi», deıdi N. Ybraıym.
Sondaı-aq stýdentter «Forým» bóliminde oılaryn ashyq aıtyp, kez kelgen suraqtardy talqylap, qoǵamdyq sheshim qabyldaı alady.
Al Free soft bóliminde Microsoft birlestiginiń lıtsenzııasy bar MSDN baǵdarlamalyq quraldardy úzdik stýdentterdiń tegin alýyna jaǵdaı jasalǵan.
Sharaǵa Microsoft kompanııasynyń Qazaqstandaǵy ókili Janar Rahymjanova kelip, stýdentterdi búgingi ashylǵan ortalyqtarymen quttyqtap, óziniń izgi nıetin aıtty.
