Ál-Farabı atyndaǵy QazUÝ-da qazaq tili kafedrasynyń 20 jyldyq mereıtoıyna arnalǵan konferentsııa ótýde
ALMATY. 12 Qarasha. QazAqparat /Názıra Eleýhan/- Búgin Almatyda Ál-Farabı atyndaǵy QazUÝ-da qazaq tili kafedrasynyń 20 jyldyq mereıtoıyna arnalǵan "Memlekettik til - ıntellektýaldyq ult qalyptastyrýdyń negizi" atty halyqaralyq ǵylymı-tájirıbelik konferentsııa óz jumysyn bastady.
Konferentsııa jumysynda tildik tulǵanyń ıntellektýaldyq qabiletin damytý joldary; tildi fýnktsıonaldy óris aıasynda meńgertýdiń ózektiligi; qazirgi qazaq tili: baǵdarlamalyq kompıýterlik oqytý; ellektıvti pánderdi oqytýdyń erekshelikteri; memlekettik tildi ınnovatsııalyq tehnologııalar arqyly meńgertýdiń joldary; fýnktsıonaldylyq jáne fýnktsıonaldyq grammatıka; qazaq tiliniń kommýnıkatıvti-fýnktsıonaldyq aspektisi; áleýmettik lıngvıstıka, negizgi máseleleri, qazirgi tańdaǵy damý baǵyttary osy jáne ózge de máseleler talqylanýda.
Shara barysynda atalmysh oqý orynnyń basqa kafedralary qazaq tili kafedrasynyń 20 jyldyq mereıtoıymen quttyqtap, tilekterin bildirdi.
"20 jyldyń ishinde kafedra kóptegen jetistikterge jetti. Shet eldermen, atap aıtqanda Qytaı, Vengrııa, Bolgarııa jáne Máskeýdiń Lomonosov atyndaǵy ýnıversıtetterimen baılanys ornattyq. Tájirıbe almasýdamyz. Memlekettik tildi damytýǵa óz úlesimizdi qosyp, ár túrli halyqaralyq konferentsııalarǵa qatysýdamyz. Bizdiń kafedranyń negizgi maqsat, baǵyty - bilimdi, básekege qabiletti, memlekettik tilmen jaqsy qarýlanǵan kásibı mamandardy daıyndaý. Qazaq tili kafedrasy tek qana til úıretý emes, úkimettiń, Elbasynyń memlekettik til týraly saıasatyn júzege asyrýǵa belsene at salysyp keledi. Qazirgi ýaqytta kafedra ujymy jańa ınnovatsııalyq oqytý ádistemelerin tereń engizý baǵytynda jan-jaqty izdene otyryp, kóptegen jumystar atqarýda. Qazir bilim básekelestigi júrip jatyr. Ǵylym, bilimi joǵary eldiń kóshi ozyq bolady. Ǵylym, bilimi tómen el kóshten ońaı qalyp qoıady. Sondyqtan búgingi daryndy, saýatty, ıntellektýaldy jastar memlekettik tilge bet burýy kerek, ulttyq qundylyqtardy qadirleýi kerek, memlekettik tilmen qarýlanýy kerek. Osy maqsatta biz búgingi konferentsııany "Memlekettik til - ıntellektýaldyq ult qalyptastyrýdyń negizi" dep aldyq", -dedi fılologııa ǵylymdarynyń doktory Saltanat Imanqulova.
Búginde kafedrada 7 dotsent, 2 fılologııa ǵylymdarynyń doktory, 21 oqytýshy qyzmet etedi, olar 12 fakýltetke orys aýdıtorııasyna qazaq tilinen sabaq beredi. 21 oqytýshynyń 17-i fılologııa ǵylymdarynyń kandıdattary. Kafedra qurylǵannan beri munda 7 meńgerýshi qyzmet etken. Búgin qazaq tili kafedrasynyń 20 jyldyq mereıtoıyna arnalǵan konferentsııada jeteýi de "Qazaq tili kafedrasyna sińirgen eńbekteri úshin" ataqtarymen marapattaldy. Sonymen qatar ár jyldary atalmysh kafedrada jumys istegen 20 oqytýshy "Qazaq tili kafedrasyna sińirgen eńbekteri úshin jáne memlekettik tildi damytýǵa qosqan úlesi úshin" ataqtarymen marapattaldy.
