Ál-Farabı atyndaǵy QazUÝ-da Halyqaralyq murajaı kúni atap ótildi
ALMATY. Mamyrdyń 18-i. QazAqparat /Erbol Turymbetov/ - Búgin Halyqaralyq murajaı kúnine oraı ál-Farabı atyndaǵy QazUÝ-dyń murajaıynda merekelik is-shara ótti,
dep habarlaıdy QazAqparat.
«Halyqaralyq murajaı kúni 1977 jyly - Halyqaralyq murajaı keńesiniń (ICOM) kezekti otyrysynda ataýly kún retinde qabyldanǵan edi. Búgingi tańda bul kúndi álemniń 150-den astam eli resmı mereke retinde atap ótedi. QazUÝ-da ótken búgingi sharany murajaı qyzmetkerleri men tarıh fakýltetiniń murajaıtanýshy stýdentteri uıymdastyrdy», deıdi ál-Farabı atyndaǵy ulttyq ýnıversıteti murajaıynyń dırektory Tamara Tájibaeva. Onda stýdentter «Álemniń aıryqsha murajaılary», «Meniń qııalymdaǵy murajaı» taqyryptarynda kórinister daıyndap, óleń men quttyqtaýlar oqydy. Vıktorınalyq suraqtar qoıyp, qazaq, orys jáne aǵylshyn tilderinde kontserttik baǵdarlamalaryn usyndy. Oǵan qatysýshylar sonymen qatar, murajaıdyń baı ekspozıtsııasymen tanysyp, ǵylymı mektepter men áıgili ǵalymdar muralarymen jáne oqý ornynyń belgili túlekteriniń jumystarymen tanysty.
