Ál-Farabı atyndaǵy QazUÝ-da Elbasynyń halyqqa Joldaýy talqylandy
ALMATY. 2 aqpan. QazAqparat /Ádilet Musahaev/ - QazUÝ oqytýshy-professorlar quramy men belsendi stýdentter Elbasynyń Joldaýyn talqylap, kózqarastarymen bólisti.
Jıyn barysynda Joldaýda áleýmettik jaǵdaıǵa erekshe kóńil bólingendigi jaıly sóz qozǵalyp, bilim berý, densaýlyq saqtaý, tilderdi damytý, taza aýyz sýmen qamtamasyz etý jáne taǵy basqa máselelerdiń sheshim tabýy ár qazaqstandyq úshin asa mańyzdy ekendigi talqylandy.
Qarashańyraq ujymy Elbasynyń bilim salasyn jańǵyrtý jolyndaǵy jasaǵan usynystaryn tolyqtaı qoldady. Joldaýda JOO-nyń bilim jáne ǵylym salasyndaǵy sapasyn arttyrý joldary aıtylǵan.
Ál-Farabı atyndaǵy QazUÝ rektory Ǵalymqaıyr Mutanov Elbasynyń JOO-ǵa qoıǵan basty talaptaryn alǵa tartty. Joldaýda negizinde eki ýnıversıtet dúnıe júzi boıynsha úzdik JOO reıtınginiń quramyna kirý kerek delingen. «Biz bar bilgenimizdi jınaqtaı otyryp Elbasy Joldaýynda qoıǵan talaptarǵa jaýap berýge tyrysamyz», - deıdi rektor.
Sonymen qatar jıynǵa qatysýshylar sapaly bilim berý júıesi Qazaqstannyń ındýstrııalyq jáne ınnovatsııalyq salasyn damytýshy qural retinde árdaıym alda júrý kerektigin aıtty.
Joldaýǵa qoldaý kórsetý maqsatynda ýnıversıtettiń barlyq fakýltetteri men kafedralarynda stýdentter men oqytýshylar arasynda belsendi túrde talqylaý isteri ótip jatyr.
