Ál-Farabı atyndaǵy Qazaq ulttyq ýnıversıtetinde Ábish Kekilbaevtyń mereıtoıyna arnalǵan merekelik kesh ótti
ALMATY. Jeltoqsannyń 21-i. QazAqparat /Názıra Eleýhan/ - Ál-Farabı atyndaǵy Qazaq ulttyq ýnıversıtetiniń Ó.A.Joldasbekov atyndaǵy Stýdentter Saraıynda halyq jazýshysy, qoǵam qaıratkeri, QR Memlekettik syılyǵynyń laýreaty Ábish Kekilbaevtyń 70 jyldyq mereıtoıyna arnalǵan merekelik kesh ótti,
dep habarlaıdy QazAqparat.
Saltanatty keshke elimizdiń zııaly qaýymy, jazýshy-qalamgerler, JOO-nyń basshylary men ustazdary, sondaı-aq stýdentter qaýymy qatysty.
Merekelik keshte QR Bilim jáne ǵylym mınıstri Janseıit Túımebaev «Búgingi toı barsha qazaqtyń, zııaly qaýymnyń toıy. 1921 jyly Orynbor qalasynda ótken Ahmet Baıtursynovtyń toıy ispettes mereıtoı», dep atap ótip, «Zamanymyzdyń zańǵar sýretkeri Ábish Kekilbaev - ıisi qazaqtyń asyly da, maqtanyshy, ónegesi de taý tulǵasy. Ábish aǵanyń aqyldy parasatty sózi, is-qımyly bárimizge ónege bola bersin. Ábish Kekilbaevqa berilgen ataq - tek qana Ábish aǵanyń ǵana emes, ádebı maıdanda qyzmet jasap júrgen, eńbek etip júrgen qaýymǵa berilgen baǵa dep aıtýǵa bolady», dedi J. Túımebaev.
Kesh barysynda Ál-Farabı atyndaǵy Qazaq ulttyq ýnıversıtetiniń Ǵylymı Keńesiniń sheshimimen toı ıesi Ábish Kekilbaevqa «Qurmetti professor» ataǵy berildi. Bilim ordasynyń rektory Baqytjan Jumaǵulov professor dıplomy men mantııasyn óz qolymen tabystady.
Elimizdiń bas oqý ornynda ótken kesh mereıtoılyq kontserttik baǵdarlamamen aıaqtaldy.
