Ál-Farabı atyndaǵy Qazaq ulttyq ýnıversıteti jańa oqý jylyn jańa oqý baǵdarlamasymen bastaıdy - Ǵalymqaıyr Mutanov
ALMATY. 24 tamyz. QazAqparat /Erlik Erjanuly/ - Ýnıversıtettegi negizgi jumys kafedralarda bolýy tıis. Bul týraly búgin Almatyda Ál-Farabı atyndaǵy Qazaq ulttyq ýnıversıteti professor-oqytýshylar quramynyń dástúrli tamyz keńesinde sóz boldy.
«Bıyldan bastap biz álemdik negizge súıene otyryp, barlyq oqý baǵdarlamalaryn ózgertip shyqtyq. Basty maqsat - túlekter ýnıversıtet qabyrǵasynan shyqqan kezde básekege qabiletti bolýy kerek. Munyń bári olar jumys izdep júrmeı, ózderi jumys ornyn jasasyn degen baǵytta jasalyp jatyr», - deıdi Ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov. Onyń aıtýynsha, qurylymdyq qaıta qurýda ár fakýltet klasterlik baǵytqa beıimdelip kafedralar irilendi. Buryn 100-den asa kafedra bolsa, qazir olardyń teń jartysy ǵana qaldy.
Ǵ. Mutanulynyń sózine qaraǵanda, «ýnıversıtet fakýltetterdiń, al fakýltet kafedralar jıyntyǵy. Negizgi jumys kafedralarda bolýy tıis. Sondyqtan kafedralardyń áleýetin kóterip otyrmyz. Bilim, ǵylym, ınnovatsııa bir-birimen tyǵyz baılanysty bolsyn dep otyrmyz. Bıyldan bastap eki dıplomdy birdeı ıgeretin mamandar daıyndap jatyrmyz. Olar birqatar baǵdarlamalardy bizde, al keıbirin sheteldik áriptesterimizde oqıdy. Onda da jaı ǵana emes, álemniń beldi ýnıversıtetterinde bilim alatyn bolady».
