Ál-Farabı atyndaǵy Qazaq ulttyq ýnıversıteti 150 myńdaı maman daıarlaǵan
ALMATY. QazAqparat - Ál-Farabı atyndaǵy Qazaq ulttyq ýnıversıteti 80 jyl ishinde 150 myńdaı maman daıarlaǵan. Bul týraly búgin Almatyda ótken «Qarııalar - altyn qazyna» atty saltanatty jıyn barysynda osy bilim ordasynyń tárbıe jumystary jónindegi departament dırektory Meńdigúl Noǵaıbaeva málimdedi.
«Osy 150 myńdaı shákirtterdi tárbıelep, elimizdiń damýyna óz úlesterin qosqan, ýnıversıtette talaı jyldan beri qyzmet istegen bizdiń ardager ustazdarymyz ben ǵalymdarymyz bar. Olardyń árqaısysy óz aldyna bir jeke mektep. Olar - ǵylymı mektep qalyptastyrǵan, ustazdyq jolyn qalyptastyrǵan, esimderi ańyzǵa aınalǵan tulǵalar. Sondyqtan biz búgin qazaqy dástúrmen, sol aǵalarymyzǵa qurmet kórsetip, olardy «ál-Farabı atyndaǵy QazUÝ-dyń 80 jyldyǵy» mereıtoılyq medalimen marapattap, shaǵyn syı-syıapatymyzdy kórsettik. QazUÝ nesimen erekshelenedi? Ol óziniń ýnıversıtettik rýhymen erekshelenedi. Óziniń jasampaz dańqy bar. Sol rýhty, jasampaz dańqty jasap otyrǵan - urpaqtar sabaqtastyǵy» - dedi óz sózinde Meńdigúl Noǵaıbaeva.
Qazaq ulttyq ýnıversıtetiniń ǵylymı kitaphanasynda ótken atalmysh is-sharaǵa barlyǵy 80 adam qatysty. Jalpy 115 adamǵa shaqyrtý jiberilgen bolatyn. Biraq birqatar ustazdar densaýlyqtaryna baılanysty kele almady.
Jıyn barysynda ardager ustazdar ýnıversıtettegi jańa ınfraqurylymdyq nysandarmen, atap aıtqanda stýdentterge qyzmet kórsetýdiń jańa úlgisi bolyp tabylatyn «Keremet» jastar resýrstyq ortalyǵynyń jumysymen jáne «ál-Farabı» murajaıymen tanysty.
