Ál-Farabı atyndaǵy QazUÝ ujymy Prezıdenttiń tarıhı úndeýin qoldaıdy
ASTANA. KAZINFORM — Ál-Farabı atyndaǵy Qazaq ulttyq ýnıversıtetinde Memleket basshysy Qasym-Jomart Toqaevtyń Qazaqstannyń Jańa Konstıtýtsııasynyń kúshine enýine oraı halyqqa joldaǵan úndeýin qoldaý jáne iske asyrý máselelerine arnalǵan keńeıtilgen alqaly jıyn ótti.
Jıynǵa oqý ornynyń basshylyǵy, belgili ǵalymdar, professor-oqytýshylar quramy, belsendi stýdentter men jastar uıymdarynyń ókilderi qatysty.
Basqosýdy ashqan Ál-Farabı atyndaǵy QazUÝ-dyń Basqarma tóraǵasy — rektory Janseıit Túımebaev Memleket basshysynyń úndeýi elimizdiń qoǵamdyq-saıası ómirindegi tarıhı beles ekenin jáne Ádiletti Qazaqstandy qurýdyń jańa jasampazdyq kezeńin aıqyndap bergenin atap ótti. Ýnıversıtet basshysy Prezıdenttiń tarıhı sózin minberden oqyp berip, onyń árbir qaǵıdatynyń zamanaýı bilim men ǵylym salasy úshin mańyzdylyǵyna toqtaldy.
— Memleket basshysy óz Úndeýinde: «Biz naǵyz Halyq Konstıtýtsııasynyń myzǵymas quqyqtyq negizine arqa súıep, barlyq maqsat-murattarymyzǵa mindetti túrde jetemiz. Zań men Tártip, Eńbeksúıgishtik pen Órleý, Tazalyq pen Tabıǵatty aıalaý syndy jasampazdyq qundylyqtaryn qoǵamda berik ornyqtyramyz», — dep naqty atap kórsetti. Bul — elimizdiń zııatkerlik jáne ǵylymı elıtasy shoǵyrlanǵan bizdiń ýnıversıtet ujymyna da tikeleı júkteletin úlken jaýapkershilik. Bizdiń basty mindetimiz — Prezıdent belgilep bergen osy qasterli qundylyqtardy óskeleń urpaqtyń boıyna sińirý, — dedi rektor Janseıit Túımebaev.
Ýnıversıtet basshysy óz sózinde Jańa Konstıtýtsııanyń zańdy kúshine enýi — búkil el tarıhyndaǵy jańa dáýirdiń bastaýy ekenin, saıası-ekonomıkalyq reformalar men aýqymdy ózgeristerdiń dańǵyl jolyn ashqanyn aıtty. Ásirese, Konstıtýtsııa kúniniń «Naýryznama» onkúndigimen qatar atalyp ótýiniń sımvoldyq máni joǵary ekenine nazar aýdardy. Bul qadam ulttyq jańarý dástúrlerin Ata zańnyń basty qundylyqtarymen — yntymaqpen, ozyq bilimmen jáne adal eńbekpen ushtastyrady.
Jıyn barysynda Jańa Konstıtýtsııanyń qabyldanýy memleket pen azamattyq qoǵam ınstıtýttaryn, sonyń ishinde joǵary bilim berý júıesin túbegeıli jańǵyrtýǵa berik negiz qalaıtyny sóz boldy. QazUÝ ǵalymdary men professorlary Prezıdent úndeýinde aıtylǵan árbir basymdyqqa ǵylymı-saraptamalyq turǵydan qoldaý bildirdi.
Alqaly jıynda sóz alǵan ýnıversıtet oqytýshylary men saıasattanýshy ǵalymdar Jańa Konstıtýtsııanyń kúshine enýi jastarǵa sheksiz múmkindikter beretinin jetkizdi. Jańa Ata zań bilimdi, erkin jáne jasampaz jastardyń elimizdi basqarýǵa, ǵylym men ekonomıkany órkendetýge ashylǵan basty dańǵyl jolyna aınalmaq.
Basqosýda ýnıversıtet rektory Janseıit Túımebaev Basqarma Tóraǵasynyń orynbasary — birinshi prorektor mindetin atqarýshy Samǵat Ermekbaevqa elimizdiń basty quqyqtyq qujaty — Jańa Konstıtýtsııa kitabyn tabystady.
Sonymen qatar shara aıasynda jańa Konstıtýtsııanyń máni men mańyzyn túsindirý jumystaryna belsene atsalysyp, el ıgiligine baǵyttalǵan sharalarǵa eleýli úles qosqan birqatar qyzmetkerler men oqytýshylar Rektordyń Alǵys hatymen marapattaldy.
Basqosýdy qorytyndylaı kele, rektor Janseıit Túımebaev Ál-Farabı atyndaǵy QazUÝ ujymy Memleket basshysynyń saıası baǵytyn tolyq qoldaıtynyn jáne el ıgiligi jolynda, Ádiletti Qazaqstannyń irgetasyn nyǵaıtý baǵytynda óziniń búkil zııatkerlik, ǵylymı jáne kadrlyq áleýetin jumyldyratynyn málimdedi.
