Ál-Farabı atyndaǵy QazUÝ-ǵa qaıtarylǵan aýmaqtaǵy bıznes-ortalyq súrildi me
ALMATY. KAZINFORM — Sot úkimimen Ál-Farabı atyndaǵy QazUÝ-ǵa qaıtarylǵan aýmaqtyń qazirgi jaı-kúıi týraly Májilis depýtaty Baqytjan Bazarbek aıtyp berdi.
Bir jyl buryn depýtat Ál-Farabı atyndaǵy QazUÝ-dyń zańsyz berilip ketken jeri sot sheshimi shyqqanyna qaramastan qaıtarylmaǵanyn jáne ol aýmaqta salynǵan kópqabatty bıznes ortalyq áli súrilmegenin aıtqan bolatyn.
QR Parlament Májilisiniń áleýmettik jelidegi resmı paraqshasynda júrgizilgen tikeleı efır barysynda Baqytjan Bazarbek bul máselege baılanysty taǵy da pikir bildirdi.
— 2021 jyldan bastap Ál-Farabı atyndaǵy QazUÝ-dyń jekemenshikke ketip qalǵan qansha jerin memleketke qaıtarý týraly tekseris bastadyq, sot sheshimi de shyqty. Ol boıynsha kadastrlyq nómiri 019 jáne 021 jer telimderi memleketke qaıtaryldy. Burynǵy menshik ıeleri Joǵary sotqa kassatsııalyq shaǵym joldady. Biraq Joǵary sot bul shaǵymdy qaraýsyz qaldyryp, birinshi satydaǵy sottyń jáne apellıatsııalyq sottyń sheshimin ózgerissiz qaldyrdy. Bylaısha aıtqanda, Esentai Mall-dyń janyndaǵy 10 qabattyq bıznes ortalyqtyń astyndaǵy jer resmı túrde memlekettik menshikke ótti deýge bolady, — dedi ol.
Baqytjan Bazarbek qazir basty másele — qaıtarylǵan aýmaqta salynǵan ǵımarattyń taǵdyryn anyqtaý ekenin atap ótti. Aıtýynsha, nysannyń menshik ıeleri ony buzýǵa ne ýnıversıtetke berýge kelispeı otyr.
— «Atlas Development» JShS-y endi ózi sheshýi kerek. Bıznes ortalyqty ózderi buzý kerek, ne bolmasa nysandy ýnıversıtettiń qaramaǵyna berýi kerek. Soǵan baılanysty úndeý de jasadym. Biraq menshik ıeleri ǵımaratty ýnıversıtetke bergisi kelmeıdi. Kerisinshe, Almaty qalasynyń jer qatynastary basqarmasyna ǵımaratty salýǵa ketken shyǵyndy óteýge baılanysty talap qoıyp otyr. Bul máselege baılanysty biz áli kúresemiz. Eger menshik ıeleri jerdi bosatpasa, bıznes ortalyqty májbúrli túrde súrý týraly talap qoıamyz, — dedi ol.
Eske salaıyq, buǵan deıin Bas prokýratýra talan-tarajǵa túsken QazUÝ jerine qatysty Almaty ákimdigine júgingenin jazǵanbyz.