Ál-Farabı atyndaǵy QazUÝ-de kıberqaýipsizdik jáne krıptologııa kafedrasy quryldy

ALMATY. KAZINFORM – Búgin ál-Farabı atyndaǵy QazUÝ- de 3265 oqytýshy-professor jumys isteıdi. Bul týraly bilim ordasynyń rektory Janseıit Túımebaev aıtty.

Aıtýynsha, Aqparattyq tehnologııalar fakýltetinde Kıberqaýipsizdik jáne krıptologııa kafedrasy quryldy. Olarǵa jasandy ıntellekt kómegimen qaýip-qaterdi anyqtaý, shabýyldardy boljaý jáne zııandy baǵdarlamalardan qorǵaý kýrstary oqytylady.

– «Bir beldeý – bir jol» bastamasy aıasynda ýnıversıtet Qytaı joǵary oqý oryndarymen qarym-qatynasty tereńdetýde.Qazirgi tańda QazUÝ men Qytaıdyń 65 joǵary oqý orny tyǵyz baılanys ornatty. Olardyń arasynda Pekın ýnıversıteti, Beıjiń shet tilder ýnıversıteti, Shanhaı shet tilder ýnıversıteti bar. Sondaı-aq Qytaı ǵylym akademııasynyń Shyńjań ekologııa jáne geografııa ınstıtýty, Sıan Tszıaotýn jáne Soltústik-batys polıtehnıkalyq ýnıversıtetimen yntymaqtastyq joǵary deńgeıde,– dedi Janseıit Túımebaev.

Sondaı-aq ol qazirgi sátte ýnıversıtette 3265 oqytýshy-professor tabysty eńbek etip jatqanyn jetkizdi.

– Onyń ishinde 24 akademık, 623 ǵylym doktory, 712 ǵylym kandıdaty, 582 PhD jumys isteıdi.Ýnıversıtet joǵary reıtıngti jýrnaldarda jarııalanǵan ǵylymı maqalalar sany boıynsha aldyńǵy qatarda tur. 2024 jyly Scopus-ta jarııalanǵan ár altynshy maqala (17,4 paıyzy) QazUÝ ǵalymdaryna tıesili. «Jas ǵalym» granttyq qarjylandyrý jobasyna 90-nan astam adam qatysyp jatyr. «Úzdik oqytýshy» ataǵyn 2024 jyly alǵan 150 adamnyń 24%-y – QazUÝ ókilderi. «Bolashaq» baǵdarlamasynyń «500 ǵalym» jobasy aıasynda ár onynshy jeńimpaz – QazUÝ oqytýshysy,– dep atap ótti rektor.

Eske salaıyq, ál-Farabı atyndaǵy qazaq ulttyq ýnıversıtetine 90 jyl toldy.