«Ál-Farabı» anımatsııalyq telehıkaıasy jaryqqa shyqty
2D formatta jasalǵan tanymdyq jobanyń ár bólimi 8 mınýttan turady.
Telehıkaıanyń basty maqsaty – túrki elinen shyqqan Ábý Nasyr Ál-Farabıdiń taǵylymdy ómir jolyn baıandaý arqyly elimizdiń búldirshinderi men jastaryn ǵylym-bilimge baýlý.
«Usynyp otyrǵan jobamyzdyń tarıh pen bolashaq arasyndaǵy altyn kópir bolaryna nyq senimdimiz. Sebebi, Ábý Nasyr Ál-Farabı – álemdik ǵylym men bilim tarıhyndaǵy uly tulǵa. Osynaý teńdessiz ǵalymnyń ómiri men ǵylymı izdenisteri jaıynda tuşymdy dúnıe jasaýdy basty mindetimiz dep bilemiz. Jobada Ál-Farabıdiń ǵylymı jetistikterge oqý, izdenis, eńbek pen danalyqtyń arqasynda jetkeni baıandalady. Mundaı kórkemdik, kontseptýaldy sheshim ekran aldyndaǵy búldirshinderdiń izdeniske, eńbek pen oqýǵa bet burýyna sebepker bola alady degen oıdamyz», – deıdi arna dırektory Maqpal Jumabaı.
Anımatsııalyq telehıkaıa álemdik órkenıet pen mádenıettiń oshaǵy bolǵan ejelgi Tıkal, Afına, Baǵdat, Kaır, Shańan, Farab qalalaryn tanystyrýdan bastalady.
«Ál-Farabı» anımatsııalyq jobasy «Balapan» telearnasynan dúısenbi-juma kúnderi, saǵat 20:10, 23:00-de kórsetiledi.
Telearna bıyl oqý-tanymdyq, shytyrman oqıǵaly, oıyn-saýyqtyq janrda 27 anımatsııalyq joba usynady. Onyń ishinde el Táýelsizdiginiń 30 jyldyǵyna arnalǵan «Meniń elim», «Babalar izi», «Baýyrjan», «Alpamys», «Qazaqstan – qyzǵaldaqtar mekeni», «Táýelsizdiktiń altyn kilti» jáne «Ǵaryshker bala Jiger» syndy anımatsııalyq týyndylar bar.
