Ál-Farabı adam resýrstaryn túsinýge kóp eńbek sińirdi – Aqtoty Raıymqulova

ALMATY. QazAqparat – QR Mádenıet jáne sport mınıstri Aqtoty Raıymqulova Ábý Nasyr ál-Farabıdiń 1150 jyldyq mereıtoıy qurmetine uıymdastyrylǵan dóńgelek ústel otyrysyna qatysty, dep habarlaıdy QazAqparat tilshisi.

Mınıstrdiń aıtýynsha, bıyl jyl basynan beri 100-den asa shara uıymdastyrylǵan.

«Koronavırýs pandemııasyna baılanysty sharalardyń kópshiligi qysqartyldy. Negizinen, ǵylymı zertteýge baǵyttalǵan sharalarǵa basymdyq berildi. Ókinishke oraı, josparlanǵan ekspedıtsııalar bolmaı qaldy. Josparlanǵan qarajat respýblıkalyq bıýdjetke qaıtaryldy. Bolashaqta bul jumys jalǵasatyn bolady. Sondaı-aq, ǵylymı zertteý ortalyqtary ashylady», - dedi Aqtoty Raıymqulova.

Bıyl uly shyǵys ǵulamasynyń eńbegin zertteýge arnalǵan QazUÝ men basqa da sheteldik oqý oryndarynyń qatysýymen onlaın konferentsııalar ótken.

Keleshekte Túrkistan oblysynyń Oqsyz kóne qalashyǵyna jaqyn jerde shaǵyn mýzeıi bar Vızıt ortalyq ashylady.

Sháýildir aýylynda qazir osyndaı Vızıt ortalyǵy bar. Ol jerden Ábý Nasyr ál-Farabıdiń 1150 jyldyǵyna oraı qoıylǵan ǵylymı materıaldardy, ekspozıtsııalardy kórýge bolady.

Odan bólek, Aqtoty Raıymqulova atap ótkende, Sırııanyń Damask qalasynda uly ǵulamanyń Vızıt ortalyǵy men mýzeıi jumys istep tur.

«Ol ortalyqta QazUÝ bólimshesi ashylady. Atalǵan bólimshede de bıyl ǵylymı jáne qalpyna keltirý jumystaryn jalǵastyratyn bolamyz. Ál-Farabı adam resýrstaryn túsinýge kóp eńbek sińirdi. Odan bólek, mádenıet pen mýzykaǵa qatysty eńbekteri de orasan zor. Ol ónerdi adamzat turmysynyń mańyzdy bóligi retinde qarastyrǵan. Sondyqtan, zertteýshiler únemi onyń eńbekterine oralady. Ǵalymnyń eńbekteri men tujyrymdamasynyń mańyzy orasan. Onyń murasyn álemge tanystyrý, nasıhattaý úshin bizge kóp eńbektený kerek», - dedi mınıstr.