Áli de ádiletti, ashyq sotqa senemin – Rýslan Berdenov
ShYMKENT. KAZINFORM – Rýslan Berdenov atys oqıǵasyna qatysty sot protsesi men qoǵamdyq pikirge baılanysty arnaıy málimdeme jasady.
Ol qazirgi ýaqytta densaýlyǵyna baılanysty sot otyrystaryna tikeleı qatysa almasa da, protsestiń barysyn muqııat baqylap otyrǵanyn jetkizdi.
- Qazirgi ýaqytta densaýlyǵyma jáne bes oq jaraqatynan keıingi ońaltý kezeńinen ótip jatqanyma baılanysty sot otyrystaryna jeke qatysýyma múmkindik joq. Alaıda, sot protsesin jáne oǵan qatysty aqparattyq keńistiktegi ahýaldy muqııat baqylap otyrmyn. Sotta jaýapker Jıembaı tarapynan aıtylyp jatqan málimdemelerge únsiz qalý múmkin emes. Bul tek qana shantaj jáne qysym kórsetý áreketi. Sońǵy ret men ony sol kúni, dál ózi ańshy myltyǵynan atyp ketken keshte kórdim. Odan keıin bizde eshqandaı baılanys bolǵan joq, - dep jazdy áleýmettik jelide.
Berdenovtyń aıtýynsha, aıyptalýshy tarapynan aıtylyp jatqan birqatar málimdemeler shyndyqqa janaspaıdy jáne bul – tek qysym kórsetý, shantaj áreketi.
- Keıinirek ol ókilderimen birge meniń qorǵaýshylarymmen baılanys ornatýǵa tyrysyp, «dostasýdy» usyndy. Keshirim berilse, shý kótermeımiz dedi, al bas tartqan jaǵdaıda «aqparattyq jarylys» jasaımyz dep ses kórsetti. Tipti, aıyptalýshynyń ákesi ózin-ózi órteıdi degen málimdeme jasalatynyn aıtty. Muny men tikeleı qysym dep baǵalaımyn. Men qandaı da bir qysym men arandatýǵa jol bermedim. Bastapqy ustanymym ózgergen joq. Qaqtyǵystyń túp-tórkini - kásibı, qyzmettik sıpatta. Jaýapker kelisim aıasyndaǵy jumysyn adal atqarǵysy kelmedi, esep berýden jaltardy. Men tek ashyqtyq pen mindettemelerdiń oryndalýyn talap ettim, - dedi ol.
Sondaı-aq qaqtyǵystyń sebebi turmystyq nemese jeke sıpatta emes ekenin, bul kásibı jáne qyzmettik qatynastarmen baılanysty ekenin atap ótti.
- Qoǵam nazaryn «qyzǵanysh», «jeke qatynas», «jubaıy» sekildi jalǵan sebepterge burý - manıpýlıatsııa, shyndyqtan alystatý. Men onyń jubaıyn da, otbasyn da tanymaımyn. Ol men úshin tek merdiger bolatyn. Budan da soraqysy – búginde bul jalǵan málimdemelerge qala ákimine qatysty tustardy da qosyp jatyr. Bul taǵy da istiń aqıqatqa emes, qysym kórsetý men bedelge nuqsan keltirýge baǵyttalǵan óreskel manıpýlıatsııa ekenin dáleldeıdi. Men mundaı málimdemelerdi úzildi-kesildi joqqa shyǵaramyn jáne olardy moıyndamaımyn. Meniń ustanymym - ózgermeıdi. Depýtattyq ókilet merzimi aıaqtalǵan soń da, memleketke adal qyzmet etý jolynan taıǵan joqpyn. Sońǵy úsh jylymdy osy jolǵa arnadym. Qala ákiminiń shaqyrýymen ákimdikke kelip, ashyq, adal jumys isteýge, halyqqa shynaıy kómek kórsetýge kúsh saldym, - dep jazdy Rýslan Berdenov.
Berdenov óziniń ákimdiktegi qyzmeti men qoǵam aldyndaǵy jaýapkershiligi týraly da oıyn bildirdi.
- Men saılaýǵa baryp, elimdi jaqsartqym keldi. Meniń artymda elimizge, ózgeristerge senetin jastar tur. Bul - úlken jaýapkershilik, men ony sezinemin. Ákimdiktegi jumysym da osy senimdi aqtaýǵa baǵyttalǵan. Maǵan qarsy aıtylǵan jala, japqan jalǵan aıyptar meni jolymnan taıdyrmaıdy. Áli de ádiletti, ashyq sotqa senemin. Búginde denemde ańshy myltyǵynyń 60-tan kóp qorǵasyn oqtary áli de bar. Bul qujatpen rastalǵan fakt. Sottaǵy joqtyǵymdy, únsizdigimdi ózderine tıimdi jaǵyna buryp, qoǵamdyq pikirmen oınaǵysy keletinder bar. Biraq únsizdik kelisim degen sóz emes. Men ádiletti sotty kútip otyrmyn, - dedi ol.
Aıta keteıik, budan buryn Shymkenttegi mamandandyrylǵan aýdanaralyq qylmystyq ister jónindegi sotta qala ákiminiń orynbasary Rýslan Berdenovke qastandyq jasaý isi boıynsha basty sot protsesi bastalǵanyn jazǵan bolatynbyz.
21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.
Rýslan Berdenovtiń aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.