Áli de 75 oqýshy aýrýhanada jatyr: Mınıstr Mańǵystaýda tamaqtan ýlanǵan balalardyń jaǵdaıyn aıtty

ASTANA. KAZINFORM – Mańǵystaý oblysynda tamaqtan ýlanǵan 387 bala ambýlatorlyq em alyp jatyr. Bul týraly Úkimet otyrysynan keıingi brıfıngte Densaýlyq saqtaý mınıstri Aqmaral Álnazarova aıtty.

«6 qyrkúıek kúni Mańǵystaý oblysy aýdandarynyń birinde mektep jasyndaǵy balalardyń jappaı ýlanýy tirkeldi. Búginde jalpy 462 bala medıtsınalyq kómekke júgindi. Onyń ishinde 92 bala aýrýhanaǵa jatqyzyldy. 17 bala aýrýhanadan shyqty. Jansaqtaý bóliminde jatqan 2 bala densaýlyq jaǵdaıynyń turaqtalýyna baılanysty jalpy bólimshege shyǵaryldy. 387 bala ambýlatorlyq em alyp jatyr. Oqıǵa ornynda densaýlyq saqtaý vıtse-mınıstri jumys isteýde», — dedi mınıstr.

Onyń atap ótýinshe, Almaty men Astanadan arnaýyl mamandar toby Mańǵystaý oblysyna jiberildi.

«Ólim-jitim joq. Jaǵdaı turaqty, balalardyń densaýlyǵy jaqsaryp keledi», — dedi Aqmaral Álnazarova. 

Eske salaıyq, Mańǵystaýdyń Munaıly aýdanynda bir mekteptiń 500-ge jýyq oqýshysy astan ýlanyp qaldy.  

Olardyń barlyǵy mektep ashanasynda tegin ystyq tamaq ishkennen keıin aýyrǵan. 

Osy oqıǵadan keıin búkil el boıynsha mektepterdiń ashanasy tekseriletin boldy.