Ál-Buharı ımam kesenesiniń tarıhy men syrlary: QazAqparat fotoreportajy
SAMARQAND. QazAqparat - Samarqandtyń mańynda Hartang dep atalatyn shaǵyn aýyl bar. Onda Ál Buharı ımamnyń kesenesi ornalasqan. Mundaǵy memorıaldyq keshende meshit, kesene, medrese men kitaphana bar. Ony jobalaý men kirpishin qalaýǵa Tashkent, Samarqand, Buqara, Shahrısabz, Hıýa, Qoqan jáne ózge de Ózbekstan qalalarynyń úzdik qurylysshylary men sheberleri qatysqan.
«QazAqparat» tilshisi keseneden arnaıy fotoreportaj ázirledi.
Keshenniń kire berisi oıyp jasalǵan qorshaýlarmen bezendirilgen, onyń aldynda eki jaǵynda bul qandaı ǵımarat ekeni týraly latyn jáne arab qaripterimen jazylǵan taqtasha tur. Keshenniń sol jaǵyndaǵy bóliginde galereıa men meshit ornalasqan. Onda 1500 adam namaz oqı alady. «Mekke - bul musylman áleminiń júregi, al Samarqand - onyń basy» deıdi. Musylmannyń osy jerge kelýi shaǵyn qajylyq jasady dep esepteledi eken.
Keshenniń oń jaǵynda kitaphana men murajaı ornalasqan. Kóne shynarlardyń aınalasynda haýyzdar bar. Onyń emdik qasıeti bar desedi. Mundaǵy sý denege de, janǵa da shıpa beredi dep esepteledi. Kópshilik osy úshin alys jerlerden keledi eken. Keshenniń ortalyǵynda Ismaıl ál-Buharıdiń qabiri ornalasqan. Onyń bıiktigi 17 metr. Shatyry eki kók tústi órnekpen bezendirilgen kúmbez túrinde jasalǵan. Qabyrǵalary da túrli ásem órnektermen bezendirilipti. Keseneniń orta tusynda ashyq-jasyl tústi onıksten jasalǵan qulpytas qoıyldy.
Memorıaldyq keshen Ózbekstan Respýblıkasynyń Prezıdenti I. Kárimovtyń bastamasymen salynǵan.
Imam ál-Buharı IX ǵasyrda Buharada týyp, ómir súrgen. Alaıda Samarqand túbinde qaza taýyp, sol jerde jerlengen. Ol jerlengen jerde meshit turǵyzylyp, shynarlar otyrǵyzyldy. Olardyń jasy 550 jyldan asady. Ál-Buharı - ıslam álemindegi uly tulǵalardyń biri, "ál-Jamı as-Salıh" hadısteriniń avtory.
